Rusiyalı generallar da etiraf edir: Yaxın həftələrdə...
Rusiya-Ukrayna müharibəsinin gedişatında tərəflərin bir-birinə qarşı raket və dron hücumlarını intensivləşdirməsi fonunda cəbhədə ciddi strateji dəyişikliklər baş verir. Xüsusilə Kremlin canlı qüvvə itkilərinin kəskin artması və Ukrayna ordusunun texnoloji üstünlüyü, rəsmi Moskanı cəbhədə dərin kadr böhranı ilə üz-üzə qoyub.
Bu barədə Crossmedia.az-a açıqlama verən hərbi ekspert Üzeyir Cəfərov bildirib ki, cəbhədəki real vəziyyəti artıq Rusiya rəsmiləri generalları da etiraf edirlər:
“Bu gün Rusiya ordusunda çağırışçı sayından qat-qat çox itki qeydə alınır. Rusiyalı generalların da etiraf etdiyi ən dəhşətli məqam budur ki, Ukrayna ordusu hər bir rus əsgərinə qarşı 2-3 dron istifadə etmək gücünə sahibdir. Rus piyadaları bu intensiv dron hücumları qarşısında tamamilə çarəsiz qalıb. Vəziyyət o həddə çatıb ki, rus əsgər və komandirləri dronlardan qorunmaq və logistikanı təmin etmək üçün bəzi istiqamətlərdə texnikadan imtina edərək heyvanlardan (atılardan və s.) istifadə etmək məcburiyyətində qalırlar. Kreml artıq müharibədə çıxılmaz və çox çətin bir vəziyyətlə üzləşdiyini anlamağa başlayıb”.
Ekspert qeyd edib ki, Rusiya tərəfindən Kiyev və digər Ukrayna şəhərləri amansızcasına bombalanmaqda davam edir: “Hətta Ukrayna xalqının ən müqəddəs dini ocaqlarından sayılan tarixi Kiyev-Peçora kompleksi (Lavra) raket zərbəsinə məruz qalıb. Yaxın saatlarda Ukrayna rəhbərliyinin Rusiyanın bu vəhşiliyinə qarşı beynəlxalq müstəviyə çıxaraq ciddi diplomatik gedişlər edəcəyi gözlənilir. Təəssüf ki, bu nə birincidir, nə də sonuncu olacaq.
Ayrı-ayrı istiqamətlərdə hansısa bir kəndin, qəsəbənin və ya kiçik bir ərazinin nəzarətə götürülməsi kimi xəbərlər gəlsə də, bu, müharibənin ümumi gedişatına heç bir halda təsir göstərmir. Ukrayna ordusunun ciddi müqaviməti qarşı tərəfi yerində saymağa məcbur edir. Önümüzdəki həftələrdə həm dron, həm də raket hücumlarının intensivliyi daha da artacaq. Rusiya-Ukrayna müharibəsi yaxın aylarda da sürətlə və amansız şəkildə davam edəcək. Yekun nəticəni isə tərəflərdən kimin hərbi texnologiyadan və dronlardan daha ağıllı, daha strateji şəkildə istifadə etməsi müəyyənləşdirəcək”.
Ayxan İbişov
10:50 16.06.2026
Oxunuş sayı: 55
