Rusiya-Ukrayna müharibəsində yeni mərhələ: Yaxın saat və ya günlərdə...
Rusiya və Ukrayna arasındakı qanlı qarşıdurma, diplomatik manipulyasiyaların və masadan qaçış cəhdlərinin bitdiyi, tərəflərin yalnız hərbi güc dilində danışdığı ən amansız mərhələsinə qədəm qoyur. Ukraynanın dinc nizamlanma təşəbbüslərinə Moskvanın raket yağışı ilə cavab verməsi, tərəflər arasında hər hansı bir kompromis ehtimalını tamamilə sıfırlayıb. Yay aylarının gəlişi ilə döyüş meydanındakı hazırlıqlarını tamamlayan tərəflər, artıq strateji hədəfləri raket və dron zərbələri ilə sarsıtmaqdadır. Kiyevin bu gün məruz qaldığı hücumlar yaxın saatlarda Moskvanın dərinliklərində hərbi və iqtisadi infrastrukturun növbəti dəfə alova bürünəcəyinin anonsu hesab olunur. Türkiyə və ABŞ-nin vasitəçilik cəhdlərini qətiyyətlə rədd edən Kremlin reallıqdan uzaq "hər şey plan üzrə gedir" bəyanatlarının fonunda, müharibənin coğrafiyası Rusiyanın logistik mərkəzlərinə və neft emalı zavodlarına doğru sürətlə genişlənir. İqtisadi və hərbi cəhətdən geri dönüşü olmayan bir çöküşə doğru irəliləyən Rusiya üçün qarşıdakı həftələr müharibənin ən ağır sınağı olacaq.
Hərbi ekspert Üzeyir Cəfərov bu barədə Crossmedia.az-a açıqlama verib:
"Rusiya ilə Ukrayna arasındakı müharibə elə bir mərhələyə çatıb ki, tərəflər arasında hər hansı bir yumşalmadan söhbət gedə bilməz. Çünki Ukrayna danışıqlar təklifini təqdim etsə də, Rusiya bundan imtina edib və son günlər tərəflər arasında raket və dron zərbələrinin intensivliyi artıb. Yaxın vaxtda hər hansı bir razılaşmanın olacağını düşünmürəm. Rusiyanın elə şərtləri var ki, onlar Ukrayna tərəfindən heç bir halda qəbul olunmur, Ukrayna da öz ərazilərindən, xüsusilə də Donbasdan vaz keçməyəcəyini bəyan edir. Bugün də Kiyevə endirilən zərbələr onu deməyə əsas verir ki, yaxın günlərdə və ya yaxın saatlarda Ukrayna tərəfi Rusiyaya cavab zərbələri endirəcək. Rusiyanın dərinliklərinə qədər zərbələr endirilir: buraya xüsusən neft emalı zavodları, strateji və hərbi obyektlər, o cümlədən qoşunların təminatını həyata keçirən logistik yollar daxildir. Onların hamısı artıq Ukrayna tərəfindən addım-addım zərbələrə məruz qalır. Bu da Rusiya ordusunun döyüş qabiliyyətini xeyli zəiflədir. Rusiya prezidenti Vladimir Putin inadkarlıq göstərərək hər şeyin plan üzrə getdiyini və qaydasında olduğunu desə də, reallıq belə deyil. Yəni Rusiyanın bu müharibə ilə bağlı çox böyük çətinlikləri və problemləri var. Qarşıdakı həftələrdə bu problemlər bir qədər də dərinləşəcək. Ona görə də dərinliklərə yönəlmiş zərbələr, əlbəttə ki, Rusiya iqtisadiyyatının daha da zəifləməsinə gətirib çıxaracaq".
Ekspert qeyd edib ki, hazırkı vəziyyətdə Moskva sülhə yaxın durmur:
"Amma danışıqlarla bağlı Rusiyanın hər hansı bir ciddi fikri yoxdur. Olsaydı, ayrı-ayrı ölkələr-qardaş Türkiyə, ABŞ, o cümlədən digər dövlətlər tərəfindən çoxdan təklif olunmuş danışıqlar masası baş tutardı. Bu danışıqlar masasına Rusiya heç bir halda gəlmək istəmir. Qarşıdakı həftələrdə biz müharibənin daha da şiddətlənəcəyinin şahidi olacağıq. Ona görə ki, artıq yay aylarıdır, tərəflər müəyyən hazırlıqlar həyata keçiriblər və həmin hazırlıqlar da raketlər və dronlar vasitəsilə özünü döyüş meydanında tam şəkildə göstərəcək".
Turqut Ansari
17:26 15.06.2026
Oxunuş sayı: 59
