Rusiyanın potensialı güclüdür, bu sanksiyalara dözmək imkanı var
Rusiya-Ukrayna müharibəsi başladıqdan sonra Avropa dövlətləri Rusiyaya qarşı sanksiyalar tətbiq edirlər. İtaliyanın Baş naziri Ciorcia Meloni açıqlamasında qeyd edib: "İtaliya sanksiyalar baxımından öz rolunu oynamağa davam edəcək. Biz bu yaxınlarda 15-ci sanksiya paketini dəstəklədik. Hazırda isə 16-cı paket üzərində iş gedir". Bəs qəbul edilən bu sanksiyalar Rusiyaya necə təsir göstərir? Avropa dövlətlərinin qəbul etdiyi sanksiyalar yalnız Ukraynanı müdafiə etmək və müharibəni dayandırmağa yönəlib?
Mövzu ilə bağlı politoloq Oqtay Qasımov Crossmedia.az saytına açıqlama verib:
"Avropanın Rusiyaya qarşı tətbiq etdiyi sanksiyalar Rusiyaya müəyyən qədər təsir göstərir və rublun məzənnə dəyərinin düşdüyü görünməkdədir. Rusiyanın potensialı güclü olduğundan bu sanksiyaların təsirinə dözmək imkanı var. Digər tərəfdən nəzərə almaq lazımdır ki, sanksiyaların özü də tam şəkildə tətbiq edilmir. Sanksiya tətbiq edən ölkələrin özləri bu və ya digər formada bu sanksiyalardan yan keçərək Rusiya ilə əlaqələr qururlar. Qərb mətbuatının yazdığına görə, məhz Qərb ölkələri Rusiya ilə hər gün təxminən 1 milyard dollarlıq enerji daşıyıcıları ticarəti aparırlar. Bu isə ildə 300 milyard dollar ətrafında ticarət dövriyyəsi deməkdir və sanksiyaların tam şəkildə həyata keçirildiyini deməyə əsas vermir".
Politoloq Ukraynanın Qərbin əlinə düşmüş bir fürsət olduğunu da vurğulayıb:
"Təbii ki, Qərbin Rusiyaya tətbiq etdiyi bu sanksiyalarda əsas məsələ Ukrayna ilə bağlıdır. Amma burada geopolitik mübarizə də özünü göstərir və Qərb bu və ya digər formada Rusiyanın güclənməsində maraqlı deyil. Bu baxımdan, hazırkı durumda son on ilə nəzər salsaq, Ukrayna məsələsi sadəcə Qərbin əlinə düşmüş bir faktordur".
Ayhan Ağarzayev
04:03 19.12.2024
Oxunuş sayı: 3901
