Aİ-nin “Mini-Münhen” qorxusu
Ukrayna münaqişəsi ilə bağlı Avropa İttifaqının (Aİ) əsas narahatlığı, bu ölkənin gələcəyinə dair aparılacaq danışıqların “mini-Münhen” ssenarisinə çevrilərək Rusiyanın gələcək “təcavüzü” üçün zəmin yaradacağıdır.
Crossmedia.az xəbər verir ki, bu barədə Politico xəbər yayıb.
Məlumata görə, ABŞ-nin gələcək prezidenti Donald Trampın münaqişəni tez bir zamanda bitirmək istəyi ilə bağlı açıqlamaları Avropadakı bu qorxuları daha da gücləndirir. Buna görə də, Avropa liderləri artıq ilk addımlarını razılaşdırıblar: Trampı Ukraynanın danışıqlara güc mövqeyindən çıxmasının vacibliyinə inandırmaq. Bununla yanaşı, Avropa liderləri ABŞ prezidentinə Ukrayna üçün əlverişsiz bir razılaşmanın onu beynəlxalq arenada zəif göstərəcəyini xatırlatmağı planlaşdırırlar.
Avropa rəsmiləri hesab edir ki, bu arqument Trampa təsir etməsə, alternativ yanaşma tapılmalıdır. Bunun üçün Aİ Ukraynaya daha çox maliyyə dəstəyi göstərməyə hazır olmalıdır. G7 tərəfindən son təqdim olunan 50 milyard avroluq kreditin Ukrayna üçün 2025-ci ilin sonuna qədər kifayət edəcəyi proqnozlaşdırılır. 2026-cı il və bəlkə də 2027-ci il üçün əlavə maliyyə yardımı isə Aİ-nin Ukraynaya dəstəyini nümayiş etdirmək məqsədi daşıyacaq.
Lakin əlavə maliyyə resurslarının toplanması çətin bir vəzifə olaraq qalır. Avropa rəsmiləri bildirirlər ki, Aİ-nin seçimləri məhduddur: “Ya Trampın planı, ya Putinin planı.” Bununla belə, Avropa liderləri, əgər cəsarətləri çatarsa, öz müstəqil alternativlərini təklif etməyə və bunun üçün ödəniş etməyə hazır olmalıdırlar.
Eyni zamanda, Aİ Rusiyaya qarşı növbəti – artıq 15-ci sanksiyalar paketini qəbul etməyə hazırlaşır. Aİ-nin Xarici İşlər nazirləri şurasının qərarı ilə bu dəfə sanksiyalar Rusiya tankerlərinə, eləcə də Şimali Koreya və Çin şirkətlərinə şamil ediləcək. Bu barədə Aİ-nin diplomatiya rəhbəri Kaja Kallas məlumat verib.
Günəş Məmmədova
07:53 18.12.2024
Oxunuş sayı: 18044
