Avropa və Amerikada miqrantlara qarşı təzyiqlər artır
Son illərdə ABŞ və Avropada miqrantlara qarşı münasibətin kəskinləşməsi və onları hədəf alan təzyiqlərin artması qlobal miqrasiya böhranının ən açıq təzahürlərindən biridir. 2022-ci ildə Avropa İttifaqına qeyri-qanuni yollarla daxil olan miqrantların sayı 330 min nəfəri keçmiş, ABŞ-da isə yalnız cənub sərhədlərində saxlanılan miqrantların sayı 2,3 milyon nəfərə çatmışdır. Bu cür artım iqtisadi, sosial və siyasi gərginliklərə səbəb olmaqla yanaşı, bəzi ölkələrdə sərt anti-miqrant siyasətlərinin və radikal sağçı hərəkatların güclənməsinə gətirib çıxarmışdır.
Mövzu ilə bağlı politoloq Məhəmməd Əsədullazadə Crossmedia.az saytına açıqlamasında bildirib:
"Yaxın Şərqdə baş verən hadisələr, həmçinin Ukrayna-Rusiya savaşı Avropa və ABŞ-a miqrant axınını artırıb. Tramp açıqlamalarında ölkəsinə gələn miqrantları qəbul etməyəcəyini bildirib. Həmçinin Avropada da miqrantlarla yerli əhali arasında anlaşmazlıqlar mövcuddur. Yerli əhali miqrantların ucuz işçi qüvvəsi kimi çalışmasından narazıdır, çünki iş yerləri azalır. Bundan əlavə, miqrantların dövlət büdcəsinə əlavə yük olduğunu düşündükləri üçün onları ölkələrindən qovmaq istəyirlər. Əvvəllər miqrantlara qarşı humanitar qanunlar qəbul edilirdi. Lakin son dönəmlərdə yerli əhali ilə miqrantlar arasındakı anlaşmazlıqlar və miqrantların dövlət büdcəsinə vurduğu ziyan dövlətlərin sərt mövqe tutmasına gətirib çıxarıb".
Ayhan Ağarzayev
15:07 17.12.2024
Oxunuş sayı: 10108
