Lukaşenkonun prezidentliyə namizəd kimi təqdim edilən sənədləri qəbul edilib
Belarus Respublikasının fəaliyyətdə olan Prezidenti Aleksandr Lukaşenkonun prezidentliyə namizəd kimi qeydiyyatı üçün tələb olunan sənədlər Mərkəzi Seçki Komissiyasına təqdim edilib.
Bu barədə Crossmedia.az "BelTA"ya istinadən xəbər verir.
Belarus Respublikasının prezidentliyinə namizəd göstərilən şəxslər 7-21 dekabr tarixləri arasında qeydiyyat üçün lazım olan sənədləri təqdim etməlidirlər.
Qeydiyyat üçün aşağıdakı sənədlər tələb olunur: prezidentliyə namizəd olmaq barədə yazılı razılıq bəyanatı, Mərkəzi Seçki Komissiyasının müəyyən etdiyi formaya uyğun tərcümeyi-hal, təhsil, iş yeri və vəzifəsi haqqında məlumatları təsdiq edən sənədlərin surətləri və ya sertifikatlar, gəlir və əmlak, eləcə də ər-arvad və birlikdə yaşayan digər yetkin yaxın qohumların gəlir və əmlakı haqqında bəyannamə.
Sənədlər potensial namizədlər və ya onların vəkalətnamə ilə səlahiyyətli nümayəndələri tərəfindən təqdim edilə bilər. Belarus Həmkarlar İttifaqları Federasiyasının sədri Yuri Senko təqdim olunmuş vəkalətnamədən istifadə edərək, Aleksandr Lukaşenkonun namizəd kimi qeydiyyatı üçün tələb olunan sənədləri MSK-ya təqdim etdiyini bildirib.
"Bu gün təqdim olunmuş vəkalətnamə əsasında Aleksandr Qriqoryeviç Lukaşenkonun prezidentliyə namizəd kimi qeydiyyatı üçün sənədləri Mərkəzi Seçki Komissiyasına təqdim etdim," - deyə Yuri Senko bildirib.
Onun sözlərinə görə, prezidentliyə namizədin irəli sürülməsi üçün zəruri olan imzalar tamamilə sakit və normal şəraitdə toplanıb: “Küçələrdə keçirilən piketlərdə, müəssisələrə səfərlər zamanı və yerli hakimiyyət orqanlarının imza toplamaq üçün müəyyən etdiyi ərazilərdə iş aparıldı. İnsanlar təşəbbüs qrupunun üzvləri ilə görüşlərdə böyük maraq və həvəslə iştirak edərək imzalarını təqdim etdilər. Düşünürəm ki, bundan sonrakı mərhələlər də sakit və normal şəkildə davam edəcək. Əhali bunu istəyir. Biz bunu imza toplama prosesində hiss etdik,” - deyə Yuri Senko əlavə edib.
Belarus Respublikasının prezidentliyə namizədlərinin qeydiyyatı 22-31 dekabr 2024-cü il tarixlərində (seçkilərə 35 gün qalmış başlayır və 25 gün qalmış başa çatır) keçiriləcək.
Seçkiqabağı təşviqat 2025-ci il yanvarın 1-dən 25-dək aparılacaq.
Belarusda prezident seçkiləri 2025-ci il yanvarın 26-na təyin edilib.
Emil Bağızadə
13:24 17.12.2024
Oxunuş sayı: 8767
