İrandan Şam səfirliyi ilə bağlı açıqlama
İran Xarici İşlər Nazirliyinin sözçüsü İsmayıl Bəkayi, ölkəsinin Şamda yerləşən səfirliyinin yenidən açılmasının "təhlükəsizlik və siyasi baxımdan zəruri şərtlərin təmin edilməsindən" asılı olduğunu bildirib.
Crossmedia.az İranın rəsmi xəbər agentliyi "IRNA"ya istinadən xəbər verir ki, Bəkayi həftəlik mətbuat konfransı zamanı mövzu ilə bağlı sualları cavablandırıb.
Şam səfirliyinin nə zaman fəaliyyətə başlayacağı ilə bağlı suala cavab olaraq, Bəkayi belə deyib:
"Suriyadakı vəziyyəti və ölkənin yeni rəhbərliyinin mümkün qərarlarını nəzərə alaraq, səfirliyin gələcəkdəki fəaliyyəti ilə bağlı qərar verəcəyik."
Bəkayi, səfirliyin yenidən açılmasının bəzi ilkin hazırlıqları tələb etdiyini vurğulayaraq, bunları əlavə edib:
"Bu hazırlıqların əsasını səfirliyin və orada çalışanların təhlükəsizliyinin təmin olunması təşkil edir. Təhlükəsizlik və siyasi baxımdan zəruri şərtlər təmin edildikdə bu addımı atacağıq."
İranın Şam səfiri Hüseyn Əkbəri isə dünən dövlət televiziyasına verdiyi açıqlamada, səfirliyin yaxın zamanda yenidən fəaliyyətə başlayacağını bildirmişdi. O demişdi:
"Hər hansı problem yaranmaması üçün Şam səfirliyində çalışan əməkdaşlarımızı qısa müddətlik Beyruta göndərmişdik. Şam səfirliyimiz tezliklə fəaliyyətə başlayacaq."
Məlumata görə, Suriyada Bəşşar Əsəd rejiminin devrilməsindən sonra İran Şamda yerləşən səfirliyinin fəaliyyətini dayandırıb və əməkdaşları ölkəni tərk edib.
Emil Bağızadə
13:29 17.12.2024
Oxunuş sayı: 18275
