Media və QHT

Yaroslavlın 116 illik yubileyində Azərbaycan mədəniyyəti nümayiş etdirilib

Rusiyanın Yaroslavl şəhərinin 116 illiyi münasibətilə keçirilən bayram tədbirində Azərbaycan milli-mədəni irsi geniş şəkildə təqdim olunub.

Crossmedia.az xəbər verir ki, Damansk parkında “Содружество Народов Ярославии” təşkilatının təşəbbüsü ilə baş tutan tədbirdə müxtəlif xalqların mədəniyyəti, musiqisi, rəqsləri, milli geyimləri, mətbəxi və milli dəyərlərini əks etdirən ustad dərsləri təşkil edilib.

Tədbirdə Yaroslavl vilayəti Millətlərarası Münasibətlər üzrə Koordinasiya Şurasının üzvü, Azərbaycan Qadınlar Birliyinin sədri Xatirə Qəmbərova rəhbərliyi ilə Azərbaycan Qadınlar Birliyi ölkəmizi təmsil edib.

Bayram çərçivəsində Azərbaycanın milli-mənəvi dəyərlərindən biri olan və UNESCO-nun Qeyri-Maddi Mədəni İrs üzrə Reprezentativ Siyahısına daxil edilmiş kəlağayıların sərgisi təşkil olunub. Sərgidə müxtəlif naxış və rəng çalarlarına malik kəlağayı nümunələri nümayiş etdirilib. Bununla yanaşı, Azərbaycanın kişi və qadın milli geyimləri də ziyarətçilərin marağına təqdim olunub.

Gənc rəssam Səbinə Məmmədova xına sənəti üzrə ustad dərsinə rəhbərlik edib. Konsert proqramında isə Günay Piriyevanın səsləndirdiyi “Azərbaycan” mahnısı və gənclərin təqdim etdiyi milli rəqslər tədbirə xüsusi rəng qatıb.

Azərbaycan Qadınlar Birliyinin fəal üzvləri Aynur Qafarova, Əfsanə Nəsibova, Lalə Məmmədova və Günay Həsənova tədbirin təşkilati işlərində yaxından iştirak ediblər.

Tədbirin sonunda Azərbaycan mədəniyyətinin təbliğində və bayram proqramında fəal iştirakına görə Azərbaycan Qadınlar Birliyinin sədri Xatirə Qəmbərovaya “Содружество Народов Ярославии” təşkilatının təşəkkürnaməsi təqdim olunub.