Serbiya Prezidenti Aleksandar Vuçiç bildirib ki, ABŞ-ın
Almaniyadan hərbi kontingentini çıxarma qərarı Vaşinqtonla Avropa İttifaqı
arasında münasibətlərin “geri dönüşü olmayan nöqtəyə” çatdığını göstərir.
Vuçiçin sözlərinə görə, bu addım iki əsas Qərb gücü arasında
maraqların artıq üst-üstə düşmədiyini nümayiş etdirən ciddi siyasi siqnaldır. O
qeyd edib ki, bu qərar Almaniya ilə ABŞ arasında qarşıdurmanın başlanğıcı ola
bilər və proses sürətlə dərinləşə bilər.
Serbiya lideri əlavə edib ki, Vaşinqtonla yaranan fikir ayrılıqları Serbiyanın iqtisadiyyatı, siyasəti və biznes mühiti üçün də mənfi nəticələr doğura bilər.
Onun müxtəlif istiqamətlərdə verdiyi mesajlar ölkənin xarici siyasət kursu ilə bağlı suallar doğurur. Belə ki, bu cür yanaşma balans siyasətinin davam etdiyini göstərir. Eyni zamanda, Serbiyanın həm Qərb, həm də digər tərəfdaşlarla münasibətləri diqqət mərkəzində qalır. Mövcud vəziyyət regionda gələcək siyasi proseslərin necə inkişaf edəcəyini daha da maraqlı edir.
Politoloq hesab edir ki, bu məsələdə Vuçiç də ziddiyyətli mövqe nümayiş etdirir: "Vuçiç bəzi hallarda siyasətində təzadlı addımlar atır. Bir tərəfdən Rusiyanı strateji tərəfdaş adlandırır, digər tərəfdən isə Avropa İttifaqına inteqrasiya məqsədilə Rusiyanın rəqibləri ilə əməkdaşlıq edir. Siyasətdə belə hallar mümkündür, lakin münasibətlərin gələcəyi ilə bağlı qəti proqnoz vermək çətindir. Müharibələr siyasi liderləri bəzən yanlış mövqelərə sürükləyir. Çünki belə vəziyyətlərdə qeyri-müəyyənlik artır. Hətta proqnoz verən təşkilatlar belə çaşqınlıq yaşayır və düzgün yox, yanlış hesablamalara üstünlük verirlər. Hesab edirəm ki, NATO-nun gələcəyi də müəyyən qədər dumanlıdır. Bu təşkilat əvvəlki təşəbbüskarlığını itirib və əsasən ABŞ-nin dəstəyinə arxalanırdı. Tramp dövründə isə bu yanaşma dəyişdi və Avropa ölkələri öz təhlükəsizliklərini özlərinin təmin etməli olduqlarını anlamağa başladılar. Hazırda Avropa daha müstəqil müdafiə siyasəti qurmağa çalışır.
Bununla belə, beynəlxalq münasibətlərdə vəziyyət sürətlə dəyişə bilər. ABŞ-də yeni administrasiya hakimiyyətə gəldikdən sonra siyasət tamamilə fərqli istiqamət ala və köklü dəyişikliklər baş verə bilər".
Fatimə
