Türkiyə və Azərbaycanın beynəlxalq münasibətlərdə həlledici rolu - ŞƏRH
Türkiyə və Azərbaycanın beynəlxalq münasibətlərdə oynadığı rol artmaqda davam edir. Hər iki ölkə öz regional təsir imkanları ilə qlobal miqyasda sülh və sabitliyin təmin edilməsində vacib aktor kimi çıxış edir. Türkiyənin Suriya, Qarabağ və hazırda davam edən Rusiya-Ukrayna münaqişəsində göstərdiyi təsir gücü, Azərbaycanın isə Cənubi Qafqazda oynadığı strateji rolu bu iki ölkənin birgə əməkdaşlıqla beynəlxalq səviyyədə daha çox təsir göstərə biləcəyinə işarə edir.
Siyasi şərhçi Azər Həsrət Crossmedia.az-a açıqlamasında Türkiyənin Yaxın Şərq, Cənubi Qafqaz, Türküstan, Orta Asiya və hətta Rusiyanın daxilindəki təsir imkanlarına toxunub:
“Türkiyənin gücü NATO üzvlüyü, dünyanın ən güclü dövlətlərindən biri olması və tarixi təcrübəsi ilə əlaqəlidir. Türkiyə Suriyada illərlə həll edilməyən münaqişəni qısa müddətdə nəticəyə yönləndirərək beynəlxalq güclər arasında öz mövqeyini sübut etdi. Qarabağ məsələsində isə qardaş Türkiyənin dəstəyi Azərbaycanın qələbəsində mühüm rol oynadı”.
A.Həsrət vurğulayıb ki, Türkiyə Rusiya-Ukrayna müharibəsində vasitəçi kimi çıxış edə bilər.
“Azərbaycan keçmiş sovet respublikası kimi Moskvaya təsir imkanlarına malikdir. Prezident İlham Əliyev də bu münaqişədə qardaş Türkiyə ilə birgə diplomatik səylər göstərir və bu əməkdaşlıq münaqişənin həllində həlledici ola bilər”.
Azərbaycan və Türkiyə qlobal münaqişələrin həllində birgə səyləri ilə yeni bir nümunə yarada bilər. İqtisadi, enerji təhlükəsizliyi və diplomatik sahələrdə güclü əməkdaşlıq potensialı onların beynəlxalq səhnədə həlledici güc kimi çıxış etməsinə imkan verir. Xüsusilə ABŞ-da gözlənilən siyasi dəyişikliklər fonunda bu iki ölkənin ortaq fəaliyyəti daha da əhəmiyyətli olacaq.
Hər iki ölkə, regional və qlobal sabitliyi təmin etmək üçün sülh və diplomatiya prinsiplərinə sadiq qalaraq, münaqişələrin həllində qətiyyətli addımlar atmağa davam edəcək.
Maral Şahverdili
15:58 13.12.2024
Oxunuş sayı: 22511
