Makron Fransada "topal ördək" vəziyyətinə düşüb
Fransa Milli Assambleyası Baş nazir Mişel Barniye hökumətinə etimadsızlıq barədə qətnamə qəbul edib. 331 deputat Nazirlər Kabinetinə etimadsızlıq qərarını dəstəkləyib.
Maraqlıdır ki, 1962-ci ildən bəri ölkə tarixində ilk dəfə hökumət etimad səsverməsindən sonra devrilib.
Son dövrlərdə Fransada Makron siyasətinə qarşı da çıxışlar olur və xalq Makronun istefasını tələb edir. Nəzərə alsaq ki, Baş nazir vəzifəsi Fransada olduqca nüfuzlu vəzifədir və cəmi 3 aydır bu vəzifəni tutan Mişel Barniye vəzifəsindən azad edilir.
Ümumən, bu gün Fransada baş verənlər Makronun yarıtmaz siyasətinin nəticəsi hesab edilə bilərmi?
Mövzu ilə bağlı politoloq Elçin Xalidbəyli Crossmedia.az saytına açıqlamasında bildirib:
"Fransada son vaxtlar baş verən hadisələr Makron hakimiyyətinin siyasi iflasıdır. Çünki Makron hakimiyyəti dönəmində Fransa dünyadakı nüfuzunu və təsir mexanizmlərini ciddi şəkildə itirməyə başlayıb."
Politoloq Fransanın müstəmləkə siyasətinin iflasından danışarkən bildirib:
"İlk növbədə Fransa Afrikadan qovulan ölkəyə çevrilib. Afrika ölkələri ardıcıl olaraq Fransanın hərbi bazalarını həmin ölkələrdən çıxarmağı tələb edirlər. Sonuncu olaraq Çad Fransaya bir ay müddət verib ki, öz hərbi infrastrukturunu Çaddan çıxartsın. Yəni Fransa böyük sürətlə Afrikadakı müstəmləkələrini itirir."
Politoloq müstəmləkə siyasətinin iflasının Fransa iqtisadiyyatına təsirinə diqqət çəkib:
"Bu o deməkdir ki, Fransa böyük sürətlə çöküş mərhələsinə qədəm qoyub. Fransa iqtisadiyyatı müstəmləkəçilik siyasətinə birbaşa bağlı iqtisadiyyatdır. Fransa Afrika ölkələrində olan təbii sərvətləri talan eləməklə Fransa iqtisadiyyatının inkişaf tempini saxlaya bilirdi. Ancaq artıq Afrikadakı müstəmləkələrin təbii sərvətlərinin talanması getdikcə çətinləşir. Ona görə də Fransa iqtisadiyyatında hazırda durğunluq dövrü yaşanır. Hətta Fransa iqtisadiyyatı çökmə mərhələsinə çox yaxınlaşıb. Təbii ki, bütün bunlar Fransa əhalisinin rifah səviyyəsinə və sosial vəziyyətinə ciddi təsir göstərir. Nəticədə Fransada əhali Makrona etiraz edir. Hazırda prezident Makron Fransada 'topal ördək' vəziyyətinə düşməkdədir."
Makronun yarıtmaz siyasətinin nəticəsindən danışan Elçin Xalidbəyli deyib:
"Həmçinin Makron parlamentə və Fransadakı sosial proseslərə nəzarəti itirmək üzrədir. Nəticədə Fransada müxalif mövqedə olan, eyni zamanda parlamentdə təmsil olunan siyasi qüvvələr Fransa Baş nazirini istefaya göndərməyə nail oldular. Prezident Makron yeni Baş nazir təyin edib. Onun da uzun müddət bu vəzifədə qalacağı inandırıcı görünmür. Çünki Makronun özünün hakimiyyəti ciddi təhlükə altındadır. Prezident Makrona qarşı Fransa tarixində ilk dəfə olaraq impiçment tətbiq olunması Fransa parlamenti tərəfindən icraata götürülüb. Fransa prezidenti Makronu impiçment təhlükəsi gözləyir. Bütün bunları nəzərə aldıqda birmənalı şəkildə bildirmək olar ki, Makronun siyasi kursu iflasa uğrayıb və Fransa çöküş mərhələsinə qədəm qoyub."
Ayhan Ağarzayev
14:54 13.12.2024
Oxunuş sayı: 22671
