Yaxın Şərq
Yaxın Şərqdə yeni qasırğa doğur – Ekspertdən AÇIQLAMA
Netanyahunun İranı təhdid edən son açıqlamaları uzun müddətdir davam edən gərgin münasibətləri daha da alovlandırıb. İsrail və İran arasındakı qarşılıqlı hücumlar bölgənin təhlükəsizlik balansını pozaraq, regionda təhlükəli və qeyri-müəyyən bir atmosfer yaradır.
Mövzu ilə bağlı siyasi şərhçi Kazım Kazımov Crossmedia.az-a verdiyi açıqlamada İran-İsrail münasibətlərinin Yaxın Şərqdə ciddi təhlükələr doğurduğunu qeyd edib:
“Netanyahunun İranı təhdid etməsi yeni bir hadisə deyil. 1979-cu ildəki İran İslam inqilabından sonra iki ölkə arasındakı münasibətlər daim gərgin olub. Son bir ildə bu təhdidlər kiçik toqquşmalarla müşahidə edilir. İsrail, İranın Suriyadakı diplomatik korpusuna zərbə endirib, İran isə cavab olaraq İsrailin Arasdr bölgəsinə hücum edib. Bu toqquşmalar miqyas baxımından kiçik görünsə də, Yaxın Şərq üçün ciddi əhəmiyyət daşıyır. İsrail və İran arasında potensial müharibə bütün region üçün təhlükəli nəticələrə səbəb ola bilər.”
Kazım Kazımov həmçinin bildirib ki, Netanyahunun son açıqlamaları İsrailin İranın teokratik rejimini dəyişdirmək və Yaxın Şərqdəki proksi qüvvələrini zərərsizləşdirmək məqsədinə işarə edir:
“Netanyahunun son çıxışı, İran rejiminin dəyişdirilməsini və İsrailin İranın Yaxın Şərqdəki proksi qüvvələrinə qarşı mübarizəsini prioritetləşdirdiyini göstərir. İran, İsrailə qarşı birbaşa döyüşməkdən əlavə, Hizbullah və Fələstindəki İslami Cihad Təşkilatı kimi qruplardan istifadə edir. İsrail isə bu qüvvələrin zərərsizləşdirilməsinə diqqət yetirir. Həmçinin, İsrail Körfəz ölkələri ilə münasibətləri gücləndirərək, bölgədəki müttəfiqlərini artırmağa çalışır. Gələcəkdə Suriyada yeni hökumətlə əlaqələrin normallaşdırılması da gündəmdə ola bilər. Çünki Bəşər Əsəd rejimi dövründə İranın Suriyada çoxlu hərbi bazaları mövcud idi və İsrail bu bazalarla zaman-zaman toqquşurdu. İsrail, əsas diqqəti İranın proksi qüvvələrini məhv etməyə yönəldəcək. Hazırkı hadisələr də bu istiqamətə işarə edir.”
Bu hadisələr regionda yeni hərbi və diplomatik manevrlərə yol aça bilər. Təhlükəsizlik balansının dəyişməsi fonunda hər iki ölkənin atacağı addımlar böyük diqqətlə izlənilməlidir.
Samirə Şərif
12:13 13.12.2024
Oxunuş sayı: 14960
