Xorvatiyanın xarici işlər naziri Qırğızıstana rəsmi səfər edib
Xorvatiyanın Xarici və Avropa İşləri naziri Qordan Qrliç-Radman Qırğızıstana rəsmi səfərə gəlib.
Crossmedia.az xarici mətbuata istinadən xəbər verir ki, bu barədə Qırğızıstanın Xarici İşlər Nazirliyi məlumat yayıb.
məlumata görə, səfər çərçivəsində Qrliç-Radman Qırğızıstanın Xarici İşlər naziri Ceenbek Kulubayev ilə danışıqlar aparacaq. Görüşdə iki ölkə arasında qarşılıqlı əməkdaşlıq məsələləri müzakirə ediləcək.
Bundan əlavə, hər iki ölkənin sahibkarlarını bir araya gətirəcək bir biznes forumu da keçiriləcək.
Qrliç-Radman dekabrın 10-da Daşkənddə Özbəkistanın Xarici İşlər naziri Bəxtiyar Səidov ilə də görüşüb. Görüşdə iki ölkənin xarici işlər nazirlərinin əməkdaşlıq və məsləhətləşmələr üzrə protokolu imzalanıb və Özbəkistan-Xorvatiya iqtisadi forumu təşkil olunub.
Qırğızıstan ilə Xorvatiya arasında son iki tərəfli görüş 23 sentyabrda BMT-nin 79-cu Baş Assambleyasının Nyu-Yorkda keçirilən sessiyasında baş tutub.
Sevinc Abuşova
11:35 12.12.2024
Oxunuş sayı: 4163
