Avropa çalışır ki, ABŞ-dən asılı olmayan ayrıca geosiyasi xətt formalaşdırsın - Şərhçi
Yaxın Şərqdə gərginliyin pik həddə çatdığı, Hörmüz boğazı ətrafında hərbi blokada riskinin artdığı bir vaxtda Fransa Prezidenti Emmanuel Makronun "hərbi həll qeyri-realdır" bəyanatı Qərb daxilindəki dərin çatları üzə çıxardı. ABŞ Prezidenti Donald Trampın müttəfiqləri İrana qarşı birbaşa hərbi koalisiyaya çağırdığı bir məqamda, Parisin bu ehtiyatlı mövqeyi sadəcə müharibə qorxusu deyil, həm də Avropanın Vaşinqtonun kölgəsindən çıxmaq cəhdidir.
Mövzu ilə bağlı Crossmedia.az-a açıqlamasında siyasi şərhçi Məhəmməd Əsədullazadə bildirib ki, Avropa ölkələri münaqişənin hərbi eskalasiyasında maraqlı deyil və əsasən diplomatik həll yollarına üstünlük verir:
"Fransa anlayır ki, hərbi müdaxilə çox ciddi və mənfi nəticələr doğura bilər. Buna görə də rəsmi Paris və ümumilikdə Avropa dövlətləri bu məsələnin diplomatik yolla həllinə çalışır. ABŞ Avropa ölkələrini hərbi koalisiyaya cəlb etməyə çalışır, lakin Fransa və digər Avropa dövlətləri birbaşa hərbi əməliyyatlarda iştirak etmək istəmir".
Hörmüz boğazı ətrafında mümkün hərbi ssenarilərə toxunan analitik qeyd edib ki, belə addımlar münaqişənin coğrafiyasını genişləndirə bilər:
"Bu cür əməliyyatlar müharibəni daha geniş regiona yaya bilər. Avropa isə bunun qarşısını almağa çalışır. Avropa İttifaqı və əsas Avropa ölkələri yeni dünya nizamında ABŞ-dən fərqli, daha müstəqil siyasət yürütmək niyyətindədir. Bu da onların Yaxın Şərqdə hərbi deyil, daha çox siyasi-diplomatik alətlərə üstünlük verməsi ilə özünü göstərir. Bu yanaşma Avropanın qlobal güc kimi mövqeyini gücləndirmək cəhdinin bir hissəsidir. Avropa çalışır ki, ABŞ-dən asılı olmayan ayrıca geosiyasi xətt formalaşdırsın və regionda öz təsir imkanlarını genişləndirsin".
Nigar Yahyazadə
11:42 04.04.2026
Oxunuş sayı: 68
