Tramp: Ukrayna Rusiya ilə sülh danışıqlarına hazırdır
Donald Tramp bildirib ki, Ukrayna münaqişəyə son qoymaq üçün Rusiya ilə sülh sazişi bağlamağa hazırdır.
Crossmedia.az xəbər verir ki, bu barədə o, özünün Truth Social sosial şəbəkəsində yazıb.
Trampın sözlərinə görə, Ukrayna tərəfinin ciddi itkilər (400 min hərbçi və çoxlu sayda mülki şəxs) verməsi dərhal atəşkəsə razılaşmağı və danışıqlara başlamağı zəruri edir. O əlavə edib ki, münaqişə davam edərsə, vəziyyət qlobal gərginliyə gəlib çıxa bilər.
Tramp vurğulayıb ki, indi Rusiya prezidenti Vladimir Putinin hərəkətə keçməsi üçün doğru zamandır. O, həmçinin Çini vasitəçi kimi çıxış etməyə dəvət edib.
Bundan əlavə, Tramp Ukraynadakı müharibə nəticəsində zəifləmiş Rusiyanın Suriya lideri Bəşər Əsədi dəstəkləməyə marağını itirdiyini bildirib. Onun sözlərinə görə, Əsəd ölkəni tərk edib, Rusiya və İran isə bütövlükdə zəifləmiş vəziyyətdədir.
Xatırladaq ki, Tramp dünən Parisdə Volodimir Zelenski ilə görüşüb.
Gültac Mehdizadə
08:49 08.12.2024
Oxunuş sayı: 17563
