Ekspert Azərbaycan və Türkiyəni hədəf alanların adını çəkdi - İran günahsızdır?
Türkiyənin Milli Müdafiə Nazirliyinin məlumatına görə, martın 9-da İran tərəfindən atılan raketin parçaları Türkiyənin Qaziantep bölgəsinə düşüb.
Bildirilib ki, İrandan atılaraq Türkiyə hava məkanına daxil olan ballistik raket Şərqi Aralıq dənizində yerləşən NATO hava hücumundan müdafiə qüvvələri tərəfindən vurulub.
Məlumata görə, vurulan raketin parçaları Qaziantepdə boş əraziyə düşüb. Hadisədə nəticəsində zərər çəkən olmayıb.
Türkiyə Milli Müdafiə Nazirliyinin məsələ ilə bağlı yaydığı açıqlamada bildirilib ki, rəsmi Ankara yaxşı qonşuluq münasibətlərinə və regional sabitliyə böyük əhəmiyyət verir:
"Ancaq ölkəmizin ərazisinə və hava məkanına yönələn hər cür təhdidə qarşı lazımi bütün addımların qətiyyətlə və tərəddüdsüz atılacağını bir daha vurğulayırıq. Türkiyənin bu istiqamətdəki xəbərdarlıqlarına riayət edilməsinin hər kəsin mənafeyinə olduğunu xatırladırıq".
Məlum olduğu kimi, daha əvvəl də İrandan atılan dron Naxçıvana düşmüşdü.
Həm rəsmi Bakı, həm də Ankara proseslərlə bağlı konkret mövqe ortaya qoyur.
Bununla belə, baş verənlər göstərir ki, "medalın görünməyən tərəfi" də var...
Türkiyəli politoloq Hüseyn Şeyhanlıoğlunun fikrincə, İranın Azərbaycan və Türkiyəni hədəf alması inandırıcı deyil: "Bu, Tehrana sərf etməz. Bu, İranın parçalanması deməkdir. İndiki anda Azərbaycan və Türkiyənin vurulması ancaq İsrail və ABŞ-nin maraqlarına uyğundur. Çünki hər iki ölkə İranı "boğmağa", onun neftinə sahib olmağa çalışırlar. Lakin hələ ki bunu bacarmırlar. Ona görə də bu cür üsuldan istifadə edərək çaxnaşma yaradırlar".
Ekspert, həmçinin söyləyib ki, bu məsələdə bir sıra qaranlıq məqamlar da var: "Məsələn, NATO Türkiyəni Yunanıstana qarşı, terror təşkilatlarına qarşı müdafiə etmədiyi halda həmin raket vurur. İkinci bir tərəfdən, bildiyiniz kimi, İranda İsrail kəşfiyyatı, yəni MOSSAD çox güclüdür. Ola bilsin, bu məsələdə MOSSAD-ın əli var. Üçüncüsü isə İranın "Shahed" dronlarının oxşarı ABŞ-də də var. ABŞ həmin texnikalardan İrana qarşı istifadə edir. Bu amili də görməzdən gələ bilərik. Beləliklə, Azərbaycan və Türkiyə baş verənlər təmkini reaksiya verməlidir".
16:36 10.03.2026
Oxunuş sayı: 154
