Jurnalist adına ləkə! - Elçin Şıxlı sərt danışdı
Lənkəran şəhərində özünü televiziya əməkdaşı kimi təqdim edərək vətəndaşlardan pul tələb edən şəxsin saxlanılması media adına edilən sui-istifadə hallarını yenidən gündəmə gətirib. Bu cür saxtakarlıq faktları təkcə ayrı-ayrı vətəndaşların maddi zərərə uğraması ilə nəticələnmir, eyni zamanda cəmiyyətin mediaya olan etimadına da mənfi təsir göstərir.
Mütəxəssislər qeyd edir ki, jurnalist adı ilə edilən fırıldaqlar informasiya mühitində inam böhranı yarada, real media nümayəndələrinin fəaliyyətinə kölgə sala və ictimai münasibətlərdə yanlış stereotiplərin formalaşmasına səbəb ola bilər. Bu baxımdan belə halların qarşısının alınması, hüquqi mexanizmlərin gücləndirilməsi və ictimai maarifləndirmənin artırılması məsələləri aktuallıq kəsb edir. Bu kontekstdə medianın imicinə dəyən zərərin miqyası və oxşar hadisələrin qarşısını almaq üçün görülməli tədbirlər mühüm müzakirə mövzusu kimi önə çıxır.
Mövzu ilə bağlı Azərbaycan Jurnalistlər Birliyinin sədri Əməkdar jurnalist Elçin Şıxlı Crossmedia.az-a açıqlama verib: "Birincisi, əhali savadlı olmalıdır. Əhalinin savad və məntiq səviyyəsi yüksək olmalı, hər yoldan ötənin sözünə inanaraq pul verməməlidir. Saxtakarlar və fırıldaqçılar isə hər zaman mövcud olub və bu hallar heç bir peşə ilə birbaşa əlaqəli deyil. Sadəcə olaraq, son dövrlərdə onlar daha çox media adından istifadə etməyə başlayırlar. Bu isə həmin şəxslərin əhali arasında onlara inanacaq insanların çox olduğuna əmin olmalarından irəli gəlir".
E.Şıxlı bildirib ki, nəticə etibarilə, insanların savadlı və ayıq-sayıq olması, gözü açıq davranması və hər yoldan ötənin sözünə qətiyyən əhəmiyyət verməməsi vacibdir.
Ayhan
16:00 27.02.2026
Oxunuş sayı: 1223
