Kadırov Murdiyev işi ilə bağlı rusiyalı rəsmiləri tənqid edib
Rusiya İstintaq Komitəsinin rəhbəri Aleksandr Bastrıkin və Rusiyanın daxili işlər naziri Vladimir Kolokoltsev Prezident tərəfindən onlara həvalə olunan vəzifələri yerinə yetirmir.
Crossmedia.az xəbər verir ki, Çeçenistan Respublikasının rəhbəri Ramzan Kadırov bu fikirləri 13 yaşlı yeniyetmə Müslim Murdiyev işi ilə bağlı danışarkən səsləndirib.
“Müslim Murdiyev işi ilə uzun müddətdir məşğuluq: hüquq müdafiəçiləri, deputatlar, senatorlar - bütün nümayəndələr, o cümlədən şəxsən mən də. İstintaq orqanları, Bastrıkin və Kolokoltsev də daxil olmaqla, vəzifələrində oturmalı olanlar öz yerlərində deyillər”,-deyə Ramzan Kadırov əlavə edib.
O, miqrasiya məsələsinə də toxunaraq, bu problemin həlli üçün Rusiya və Özbəkistan prezidentləri arasında keçirilən müzakirələrdə şəxsən iştirak etdiyini bildirib:
“Kolokoltsev əmr verdi və bizim ehtiyacımız olan qardaşlarımızı döyür, saxlayır və ölkədən çıxarırlar. Sonra da deyirlər ki, heç kim bizimlə dost olmaq istəmir. Niyə Ukrayna və Gürcüstanı itirdik? Niyə digər dövlətlərlə münasibətlər gərgindir? Çünki insanlar dövlətin daxilində nə baş verdiyini bilmirlər. Onlar bölgələrə getmirlər, insanlarla ünsiyyət qurmurlar. Oturub kreslolarında nələr baş verdiyini görmürlər.”
Kadırov həmçinin hüquq-mühafizə orqanlarının Prezidentin həvalə etdiyi vəzifələri keyfiyyətlə yerinə yetirmədiyini qeyd edib.
“Müslim işi üzrə məhkəmə prosesi 18 dekabrda keçiriləcək. O, nə həbs olunacaq, nə də zərər görəcək. Hər kəslə şəxsən danışmışam. Tezliklə azad ediləcək”,- deyə Çeçenistan rəhbəri bildirib.
Qeyd edək ki, Müslim Murdiyev işi üzrə cinayət işi Moskvanın Rusiya İstintaq Komitəsinin Əsas İstintaq İdarəsində araşdırılır. O, bir neçə epizod üzrə ittiham olunub. Yeniyetmə artıq yeddi aydır ev dustaqlığındadır. Ona ictimai qaydanı qrup halında kobud şəkildə pozmaq və vətəndaşlara qarşı zor tətbiq etmək ittihamı irəli sürülüb. Murdiyevlə yanaşı, iş üzrə daha dörd nəfər ittiham olunur.
17:58 05.12.2024
Oxunuş sayı: 3473
