Fransa "ofsayta düşüb": Makron nə edəcəyini bilmir
"Politico" nəşri bildirib ki, Fransada sağçı qüvvələrin artan populyarlığı fonunda Prezident Emmanuel Makron əsas dövlət vəzifələrə öz müttəfiqlərini təyin etməyə tələsir. Bu addım ölkədə siyasi balansın dəyişə biləcəyi ehtimalı ilə əlaqələndirilir və Yelisey sarayında strateji mövqelərin qorunmasına hesablanıb.
Qeyd olunur ki, qarşıdakı siyasi proseslər və sağçı partiyaların reytinqində müşahidə olunan artım hakim komandanı qabaqlayıcı addımlar atmağa sövq edir. Analitiklərin fikrincə, Makronun bu qərarı həm daxili idarəetmədə sabitliyi saxlamaq, həm də mümkün hökumət dəyişikliyi ssenarilərinə hazır olmaq məqsədi daşıyır.
Bu barədə Crossmedia.az-a danışan politoloq Azad Məsiyev bildirib ki, Fransa Prezidentinin fəaliyyəti ölkədə zaman-zaman narazılıqlar və etirazlarla müşahidə olunub: "Makronun apardığı siyasət nəticəsində müxalifət fəallaşır, xüsusilə sağçı qüvvələrin təsiri artır. Makronun daxili və xarici siyasəti Fransa xalqının və dövlətinin maraqlarına tam uyğun gəlmir. Zaman-zaman prezident Makron öz hakimiyyətini qorumaq məqsədilə antidemokratik addımlar atmış, etiraz edən təbəqənin səsini boğmaq üçün güc tətbiq etmişdir. İnsanlara və etirazçılara qarşı sərt davranışlar bunun bariz nümunəsi olaraq diqqət çəkir",- deyə o vurğulayıb.
O, əlavə edib ki, Makron əsas məqsəd kimi hakimiyyətini uzatmaq və növbəti seçkilərdə partiyasının yenidən hakimiyyətdə qalmasını hədəfləyir, lakin hazırda Fransada fəallaşan sağçılar açıq şəkildə göstərir ki, ölkə siyasətində, ümumilikdə isə Avropa İttifaqında sağçı qüvvələrin rolu artır: "Bu kontekstdə Avropa İttifaqının apardığı siyasət bir sıra hallarda fiyaskoya uğramaqdadır. Aparılan sorğular Avropa iqtisadiyyatının çöküşünü göstərir və Fransanın bu məsələlərdə rolu həlledici olaraq qalır. Fransada iqtisadi-sosial vəziyyətlə bağlı etirazlar, istər kiçik təsərrüfat sahələrində, istərsə də ölkə üzrə, xalqın narazılığını açıq şəkildə ortaya qoyur. Bu baxımdan, Makronun siyasəti əsasən hakimiyyətini qorumağa və növbəti seçkilərdə mövqeyini möhkəmlətməyə yönəlib",- deyə o vurğulayıb".
Bununla belə, sağçıların fəallaşmasının Fransada yeni siyasi düzənin formalaşmasına gətirib çıxara biləcəyini qeyd edən A. Məsiyev növbəti seçkilərdə sağçıların qələbəsi nəticəsində ölkədə yeni siyasət sisteminin meydana gəlməsinin nəticələnəcəyini bildirib.
O, həmçinin qeyd edib ki, indiki iqtisadi durum və komfort şəraitində yaşayan Fransa xalqı böyük bir narazı təbəqə yaratmışdır: "Dünyada baş verən proseslərdə Fransanın oyundan kənarda qalması da xalqın narahatlığını artırır. Bu baxımdan, Makronun siyasəti nəticəsində sağçıların fərqlənməsi və siyasətdə təsirinin artması artıq açıq şəkildə görünməkdədir. Fransada sağçı qüvvələrin yüksəlişi və Makronun müttəfiqlərini əsas vəzifələrə təyin etməsi, ölkədə siyasi balansın qorunması və hakimiyyət strategiyasının davamlılığını təmin etmək baxımından mühüm hadisə kimi qiymətləndirilir".
Nigar Yahyazadə
11:44 19.02.2026
Oxunuş sayı: 963
