Müharibənin taleyi Rusiyanın əlindədir?
Ukraynanın xarici işlər naziri Andrey Sbiqanın “Rusiya Ukraynadakı ABŞ şirkətlərinə məqsədyönlü şəkildə hücum edir” bəyanatı müharibənin miqyasının və siyasi mesajlarının daha da genişləndiyini göstərir. Bu iddia artıq təkcə hərbi obyektlərin deyil, xarici kapitalın və beynəlxalq iqtisadi maraqların da birbaşa hədəfə çevrildiyi barədə ciddi suallar yaradır.
Belə bir vəziyyətdə əsas müzakirə mövzusu ondan ibarətdir ki, bu addımlar Ukraynanın mövqeyini daha da zəiflədə bilərmi? Eyni zamanda, bu proses ABŞ-nin mövqeyinə və müharibənin gələcək gedişatına necə təsir göstərəcək? Ümumiyyətlə, artan eskalasiya fonunda Rusiya–Ukrayna müharibəsinin hansı ssenari üzrə və nə vaxt başa çata biləcəyi məsələsi yenidən gündəmin əsas suallarından birinə çevrilir.
Mövzu ilə bağlı politoloq, professor Əlimusa İbrahimov Crossmedia.az-a açıqlama verib: "Əlbəttə, bu gün Rusiya Ukraynadakı istisnasız olaraq bütün ölkələrin şirkətlərini raket atəşinə məruz qoyur və Rusiya artıq raket atəşinə tutduğu təşkilatın, müəssisənin hansı ölkəyə məxsus olduğunu nəzərə almır. Bu gün Rusiya üçün istisna yoxdur. Yəni, Ukraynada fəaliyyət göstərən şirkətlər arasında hansı ölkəyə məxsus olmasından asılı olaraq fərq qoyulmur. Amma Ukrayna təbii ki, Rusiyanın bu hərəkətlərindən öz mənafeləri naminə istifadə etməyə çalışır. Məlum olduğu kimi, ABŞ davam edən müharibədə Rusiya mövqeyindən çıxış edən addımlar atmış kimi göstərilir. ABŞ Ukraynanı atəşkəsə getməyə və Rusiyanın irəli sürdüyü şərtlərlə razılaşmağa məcbur etməyə çalışır. Məhz buna görə də bu gün Ukraynanın əlində Rusiyanın əleyhinə istifadə edə biləcəyi müəyyən məsələlər var".
Onun fikrincə, bunlardan biri təbii ki, Ukraynada fəaliyyət göstərən ABŞ şirkətləridir: "Bu yaxınlarda məhz Sibiqa Rusiyanın Ukraynada raket atəşinə məruz qoyduğu ABŞ şirkətlərinin siyahısını dərc edib və həmin şirkətlərdə yaralanan və həyatını itirən vətəndaşların sayını da göstərib. Ukrayna rəsmiləri bunu ABŞ-nin Rusiyaya münasibətinin dəyişməsi üçün edir. Lakin bu münasibətin dəyişməsi ilə bağlı hələlik hər hansı reaksiya yoxdur və ABŞ rəsmiləri tərəfindən də bu barədə açıqlama verilməyib. Təbii ki, Rusiya ümumi şəkildə Ukraynanın hərbi obyektlərini, yaşayış massivlərini, zavod və fabriklərini, infrastruktur obyektlərini raket atəşinə tutur. Hər keçən gün Ukraynada həm dinc sakinlər, həm də siyasətçilər arasında ölənlərin sayının artdığını görürük. Eyni zamanda Rusiyanın Ukraynanın müxtəlif obyektlərini atəşə tutmasının şahidi oluruq və Ukrayna hələ də bunun qarşısını tam ala bilmir. Bu, müharibədir və müharibədə hər iki tərəfdən atəşlər olur. Amma Rusiyanın Ukrayna ərazisinə daha çox raket və dron göndərdiyini müşahidə edirik. Bu gün bütün dünyada Rusiya–Ukrayna müharibəsinin qarşısını almağa cəhd edilir. İsveçrədə aparılan danışıqlar davam edir və nəticəsi hələ məlum deyil. Tərəflərin irəli sürdüyü qəbul edilməz şərtlər fonunda müharibənin qısa müddətdə başa çatmasının mümkün olmadığı qənaəti formalaşır".
Müsahibimiz əlavə edib ki, Rusiya ilə Ukrayna arasında müharibənin nə vaxt başa çatacağı barədə konkret fikir söyləmək mümkün deyil: "Hesab edirəm ki, savaş Rusiyanın istədiyi vaxt bitə bilər, lakin bunun nə zaman və hansı formula əsasında baş verəcəyi məlum deyil. Bu, Ukraynanın gücləndirilərək Rusiyaya qarşı davam gətirməsi formasında baş verə bilər. Yaxud da Rusiya Ukraynadan özünə sərf edən qədər ərazi işğal etdikdən sonra mümkün ola bilər. Gözlənilən isə budur ki, mövcud şərtlər daxilində nə Rusiya, nə də Ukrayna danışıqlara və sülh müqaviləsinin bağlanmasına hazır görünür".
Ayhan
11:11 19.02.2026
Oxunuş sayı: 651
