Media və QHT
Mətbuat Şurası sərt xəbərdarlıq etdi
Azərbaycan Mətbuat Şurası qida və pərakəndə sektorla bağlı mediada yayılan məlumatlara dair açıqlama yayıb.
Crossmedia.az-ın məlumatına görə, bildirilib ki, “Azərbaycan Jurnalistlərinin Etik Davranış Qaydaları”na əsasən media materiallarının ictimai əhəmiyyətlilik dərəcəsi sağlamlıq və təhlükəsizliyin qorunması, ağır cinayətlərdən və vəzifədən sui-istifadədən müdafiə, həmçinin ictimaiyyətin yanlış istiqamətləndirilməsi riskinin aradan qaldırılması kimi meyarlarla müəyyənləşdirilir.
Şura qeyd edib ki, son dövrlər bəzi media orqanlarında müxtəlif qidaların zərərli olması, bazardakı məhsulların keyfiyyətsizliyi ilə bağlı yoxlanılmamış və ümumiləşdirilmiş iddialar yer alır. Bu barədə Ticarət Şəbəkələrinin İnkişafı İctimai Birliyinin Mətbuat Şurasına ünvanladığı məktubda da narahatlıq ifadə olunub. Qurum belə materialların təkcə ayrı-ayrı şirkətlərin deyil, bütövlükdə satış və ərzaq təminatı sisteminin nüfuzuna, eləcə də iqtisadi etimad mühitinə zərər vurduğunu əsaslandırıb.
Açıqlamada vurğulanır ki, yanlış təqdimatlar və təsdiqlənməmiş məlumatların yayılması qida sahəsində dövlət nəzarətinin etibarlılığına şübhə yarada, nəticədə cəmiyyətdə dövlətə inamsızlıq kimi mənfi hallara səbəb ola bilər. Bu baxımdan, qida və pərakəndə sektorla bağlı iddialar mütləq ciddi faktlara söykənməli, mövzu üzrə fikir bildirən şəxslərin statusu və peşəkarlığı nəzərə alınmalıdır.
Mətbuat Şurası jurnalistləri qida təhlükəsizliyinin cəmiyyətin təhlükəsizliyinin mühüm tərkib hissəsi olduğunu nəzərə almağa çağıraraq, kimlərinsə reputasiyasına zərər vurmağa hesablanmış məlumatların və dezinformasiyanın yayılmasına alət olunmamağı tövsiyə edib. Eyni zamanda, müvafiq dövlət qurumları və sahə təşkilatlarının da operativ yanaşma sərgiləyərək cəmiyyətin düzgün məlumatlandırılmasını təmin etməsinin vacibliyi qeyd olunub.
15:06 10.02.2026
Oxunuş sayı: 822
