Alekseyevə qarşı sui-qəsd cəhdi: Rusiyada "general ovu" başlayıb?
Moskvada Rusiya Müdafiə Nazirliyinin yüksək rütbəli zabiti, general-leytenant Vladimir Alekseyevin yaşayış binasında atəş açılması nəticəsində yaralanması regionda təhlükəsizlik məsələləri və müharibə fonunda baş verən hadisələrin xarakteri ilə bağlı yeni müzakirələrə səbəb olub. Hadisənin motivi və arxasında dayanan qüvvələr barədə müxtəlif ehtimallar irəli sürülür. Bəzi versiyalarda bunun xarici xüsusi xidmət orqanlarının fəaliyyəti ola biləcəyi iddia edilir, digər yanaşmalarda isə hadisənin daxili narazılıqlar və ya fərdi motivlərlə bağlı ola biləcəyi istisna edilmir.
Baş verən hadisə barədə Crossmedia.az-a danışan hərbi ekspert Üzeyir Cəfərov bildirib ki, Moskvada atəş açılması nəticəsində ağır yaralanan general-leytenant Vladimir Alekseyevlə bağlı müxtəlif versiyalar səsləndirilir və hazırda hadisənin səbəbləri ilə bağlı fərqli ehtimallar müzakirə olunur: "Ümumilikdə isə qeyd olunur ki, səslənən hər bir versiyanın müəyyən qədər yaşama hüququ var. Vladimir Alekseyev Ukrayna doğumludur və bu amil də hadisə ətrafında aparılan müzakirələrdə xüsusi vurğulanır. Mediaya istinadən onun doğulduğu ölkə ilə bağlı mövqeyi və fəaliyyətləri barədə müxtəlif fikirlər səsləndirilir. Eyni zamanda o, Rusiya Müdafiə Nazirliyinin yüksək rütbəli nümayəndələrindən biri hesab olunur. Bildirilir ki, ötən illərdə baş vermiş Priqojin hadisələri zamanı da Rusiya Müdafiə Nazirliyinin müavini Yunus-bek Yevkurovla birlikdə Priqojinlə danışıqlar aparan şəxslər sırasında yer alıb".
Ekspert əlavə edib ki, bu, son dövrlərdə hədəfə alınan ilk general deyil: "Son vaxtlar oxşar hadisələrin sayının artması diqqət çəkir. Hadisədən dərhal sonra Rusiya rəsmiləri, o cümlədən xarici işlər naziri Sergey Lavrov bu hücumun Ukrayna xüsusi xidmət orqanlarının işi ola biləcəyi ilə bağlı açıqlama verib. Bununla belə, hadisənin kim tərəfindən törədilməsindən asılı olmayaraq, belə bir hadisə Rusiya Silahlı Qüvvələrinin yüksək rütbəli zabitlərinin təhlükəsizliyinin lazımi səviyyədə təmin olunmaması barədə müzakirələrə səbəb olur. Digər tərəfdən, Ukrayna kəşfiyyatının imkanları ilə bağlı da müxtəlif fikirlər səsləndirilir və bəzi şərhlərdə onun Rusiyanın mərkəzində belə əməliyyatlar həyata keçirə biləcək səviyyədə olduğu iddia olunur. Rusiya vətəndaşlarının hadisəyə münasibəti ilə bağlı da fərqli yanaşmalar mövcuddur. Nəzəri baxımdan etiraz ehtimalı mümkün sayılsa da, ümumi mənzərədə müharibənin cəmiyyətin böyük hissəsi tərəfindən birbaşa hiss olunmadığı, bu mövzuda açıq mövqe bildirənlərin sayının məhdud olduğu qeyd edilir. Məlumatlara görə, general yaşadığı binanın girişində, lift meydançasının qarşısında atəşə tutulub. Hücumu həyata keçirən şəxsin qadın olduğu və hadisə yerini dərhal tərk etdiyi bildirilir. Hadisə zamanı generalın cavab atəşi açmağa imkan tapmadığı, onun kömək çağırışını eşidən qonşuların hadisə yerinə çıxdığı və ilkin yardım göstərildiyi qeyd olunur. Hazırda onun vəziyyətinin ağır və kritik olduğu bildirilir, müalicə aldığı yer açıqlanmır. Rusiya Prezidentinin mətbuat katibi Dmitri Peskov da məsələyə münasibət bildirərək generalın sağ qalacağına ümid etdiklərini və hadisənin bütün təfərrüatlarına aydınlıq gətiriləcəyini deyib. Ümumilikdə isə hadisə ətrafında müxtəlif ehtimallar səsləndirilir və proseslərin inkişafı diqqətlə izlənilir".
Ayhan
10:27 09.02.2026
Oxunuş sayı: 1688
