Nəsimi Nəbizadə "Qurtuluş" Reabilitasiya Mərkəzi ilə bağlı səssizliyini pozdu
Tanınmış teleaparici Nəsimi Nəbizadə, bir müddət əvvəl fəaliyyətini dayandıran "Qurtuluş" reabilitasiya mərkəzi ətrafında yaranmış qalmaqal və mərkəz barəsində başladılmış cinayət işi ilə bağlı yayılan xəbərlərə aydınlıq gətirib.
Crossmedia.az xəbər verir ki, jurnalist Sumqayıt Şəhər Prokurorluğu tərəfindən mərkəzdə araşdırmaların aparıldığından və fakt üzrə cinayət işinin başlanıldığından xəbərdar olduğunu bildirib. Lakin o, həmin vaxt mərkəzdə olmadığını və hazırda bu müəssisə ilə heç bir rəsmi əlaqəsinin qalmadığını vurğulayıb: ‘’Eşitmişəm ki, fakt üzrə cinayət işi başlanılıb. Amma mənim həmin mərkəzlə artıq əlaqəm yoxdur, ona görə də işin nə yerdə olmasından məlumatsızam".
Nəsimi Nəbizadə mərkəzdən "qaçması" ilə bağlı yayılan iddiaları da qəti şəkildə təkzib edib. O, mərkəzə əməkdaşlıq təklifi əsasında dəvət olunduğunu və orada cəmi 4 ay fəaliyyət göstərdiyini qeyd edib. Ayrılma səbəbi kimi isə işlə bağlı planlaşdırılan layihənin reallaşmamasını göstərib.
Hazırda yeni iş təklifləri aldığını deyən Nəbizadə, bu təklifləri dəyərləndirdiyini və yaxın vaxtlarda yeni fəaliyyəti ilə bağlı rəsmi açıqlama verəcəyini qeyd edib.
Sevinc Yarməmmədova
16:01 20.01.2026
Oxunuş sayı: 1412
