Jurnalistikadan sui-istifadə edənlər peşədən uzaqlaşdırılmalıdır
Son zamanlar kiçik və orta sahibkarları şantaj yolu ilə hədələyən xəbər saytlarının rəhbərlərinin həbs olunması medianın etibarlılığına ciddi zərbə vurub. Bu hadisələr jurnalistikadan sui-istifadə hallarının geniş yayıldığını bir daha göstərir.
Mövzu ilə bağlı Crossmedia.az-a açıqlama verən media eksperti Azər Həsrət qeyd edir ki, jurnalist adından istifadə edərək qanunsuz əməllərlə məşğul olan şəxslər əsl peşəkarların işinə kölgə salır:
“Çox təəssüf ki, uzun illərdir bu problemlə mübarizə aparırıq, lakin hələ də nəticə əldə edə bilmirik. Belə şəxslər qəfil ortaya çıxır və jurnalistikadan asan pul qazanmaq üçün istifadə edirlər. Bu insanlar jurnalistikaya doluşaraq əsl peşəkarları kölgədə qoyur. Halbuki etik və obyektiv jurnalistlər özlərini hər yerdə önə çıxarmağa çalışmır, lakin bu cür insanlar jurnalist adı ilə hər yerdə fərqlənmək istəyir.”
Azər Həsrət jurnalistikadan sui-istifadə hallarının qarşısını almaq üçün sərt tədbirlər görülməli olduğunu vurğulayır. Onun fikrincə, müxtəlif sahələrdə tətbiq olunan məhdudiyyətlər jurnalistika sahəsində də tətbiq edilməlidir:
“Necə ki, sürücü qayda pozub ağır qəza törədərsə, sürücülük hüququndan məhrum edilir, jurnalistikada da bənzər yanaşma olmalıdır. Mən illərdir təklif edirəm ki, jurnalistikadan sui-istifadə edənlər müəyyən müddətə və ya ömürlük peşədən uzaqlaşdırılsın. İlk dəfə xəbərdarlıq, ikinci dəfə cəza və üçüncü dəfə ömürlük qadağa tətbiq edilməlidir.”
Azər Həsrət bildirir ki, bu təkliflər həyata keçirilsə, jurnalistika sahəsində etik və obyektivlik təmin olunar, medianın etibarlılığı bərpa edilər. Sonda vurğulayır ki, peşəkar və vicdanlı jurnalistika cəmiyyətin inkişafında əvəzsiz rol oynayır və bu nüfuzu qorumaq hər kəsin borcudur.
Nihat Tahirov
07:42 29.11.2024
Oxunuş sayı: 10961
