Avropa
Dondurulmuş Rusiya aktivləri Ukrayna üçün həlledici amilə çevrilir – Politoloq
Ukrayna müharibəsinin maliyyə və təhlükəsizlik ölçüləri getdikcə daha qabarıq şəkildə ön plana çıxır. Ukrayna Prezidenti Volodimir Zelenskinin Avropa İttifaqı Şurasındakı çıxışı da göstərir ki, Rusiyanın dondurulmuş aktivlərinin Ukraynaya ötürülməsi təkcə iqtisadi deyil, eyni zamanda hərbi və diplomatik baxımdan strateji əhəmiyyət daşıyır. Bu vəsaitlərin gecikməsi Ukraynanın müdafiə imkanlarına, xüsusilə də dron istehsalına birbaşa təsir göstərir. Paralel olaraq, Avropanın sülh prosesində rolu və ABŞ-nin mümkün yeni hücumlara reaksiyası regional təhlükəsizlik arxitekturası baxımından ciddi suallar doğurur. Bu kontekstdə dondurulmuş aktivlər mövzusu müharibənin gedişatını və danışıqlar prosesinin gələcəyini müəyyən edən əsas amillərdən biri kimi çıxış edir.
Crossmedia.az-a açıqlama verən politoloq Zeynal Əmrəliyev bildirib ki, hazırda Avropa dövlətlərində Rusiya ilə bağlı ciddi tərəddüdlər mövcuddur:
“Rusiya aktivlərinin Ukraynaya çatdırılması üçün Qərbdə ümumi fikir formalaşmalıdır. Lakin Avropa ölkələri hələ də Rusiya ilə müəyyən anlaşma ümidini saxlayırlar. Bu isə həlledici qərarların qəbul edilməsini çətinləşdirir. Bu baxımdan hesab edirəm ki, Rusiya aktivlərinin Ukraynaya ayrılması vaxt aparacaq”.
Politoloqun sözlərinə görə, əgər yaza qədər bu aktivlər Ukraynaya verilməsə və rəsmi Kiyevə maliyyə dəstəyi göstərilməsə, Ukraynanın silah təminatında ciddi problemlər yarana bilər:
“Bu vəziyyət birbaşa döyüşlərin gedişinə təsir göstərəcək. Nəzərə almaq lazımdır ki, Rusiya qış əməliyyat planlarına uyğun olaraq fəaliyyətini intensivləşdirib və xüsusilə Donbas cəbhəsində aktivlik nümayiş etdirir”.
Z.Əmrəliyev qeyd edib ki, qarşıdakı dövrdə proses qarşılıqlı sərtləşmə fonunda davam edəcək:
“Qərb Rusiyaya qarşı sanksiyaları sərtləşdirəcəyi kimi, Moskva da Ukraynaya qarşı hərbi əməliyyatlarını aktivləşdirəcək. Ukraynanın həm Rusiyanın hücumlarının qarşısını almaq, həm də öz əks-hücum əməliyyatlarını həyata keçirmək üçün silaha ehtiyacı var. Çünki Kiyev güzgü effekti ilə hərəkət edir. Rusiya Ukraynanın enerji obyektlərini hədəf alırsa, Ukrayna da eyni yanaşmanı tətbiq edir”.
Politoloq vurğulayıb ki, Qərbin Ukraynaya maddi yardım göstərməsi artıq qaçılmazdır:
“Ən real variant Rusiya aktivləri ilə bağlı qərarın verilməsidir. Düşünürəm ki, qarşıdakı dövrdə bunun şahidi olacağıq. Hərçənd proses ləng gedə bilər, amma bu məsələ gündəmdən çıxmayacaq”.
Mehriban Yariyeva
11:20 22.12.2025
Oxunuş sayı: 2026
