Kremldə hazırlandığı və Ağ Evin dünya ictimaiyyətinə təqdim etdiyi ddia olunan "Tramp planı" əslində...- SENSASİYA
Ukrayna ABŞ Prezidenti Donald Trampın sülh planına cavab olaraq qoşunların Donbasdan çıxarılması və NATO üzvlüyündən imtinası ilə bağlı təklifləri rədd edib. Rusiya-Ukrayna müharibəsini sona çatdıra biləcəyi iddia olunan Trampın sülh planı heç də Ukraynanın siyasi maraqlarına uyğun deyil, əksinə, ziddir. Hər iki tərəf üçün müharibənin sona çatdırılması prioritet olsa da ABŞ-nin məsələyə müdaxiləsi, hansı tərəfdən çıxış etdiyini bilinməməsi vəziyyəti bir az qəlizləşdirir. Maraqlıdır Ukrayna bu şərtlərlə razılaşmayaraq nə etmək istəyir? Hazırda müharibənin bitməsi üçün hansı əsas addımlar atılmalı, plana hansı düzəlişlər edilməlidir?
Məsələ ilə bağlı politoloq Elçin Xalidbəyli Crossmedia.az-a açıqlama verib: "Kremldə hazırlandığı və Ağ Evin dünya ictimaiyyətinə təqdim etdiyi ddia olunan "Tramp planı" əslində Ukraynanın gələcək taleyini ciddi risk altına salır. Bu, ilk növbədə Ukraynanın olduqca böyük ərazi itkilərinə gətirib çıxara biləcək maddələrlə bağlıdır. Digər tərəfdən, Rusiyanın Ukraynaya diktə etmək istədiyi bir sıra hərbi və siyasi müddəalar da həmin sənəddə öz əksini tapır. Bu müddəalar sırasında Ukrayna ordusunun say tərkibinin məhdudlaşdırılması, Ukraynada rus dilinin dövlət dili statusu qazanması və bu kimi Ukrayna dövlətinin gələcək taleyini şübhə altına alan digər məqamlar mövcuddur. Ən vacib məsələ isə Ukrayna üçün təhlükəsizlik təminatının verilməsidir. Bu amil Ukrayna baxımından həlledici əhəmiyyət daşıyır. Lakin Rusiya bu təminatlara qəti şəkildə qarşı çıxır. ABŞ və Avropa İttifaqı isə hələlik Ukraynaya real və konkret təhlükəsizlik təminatının verilməsi məsələsində tərəddüd göstərir".
Ekspert əlavə edib ki, mövcud mərhələdə sülh sazişinin imzalanması Ukrayna üçün qətiyyən sərfəli deyil: "Xüsusilə ona görə ki, Ukrayna sülh sazişinə imza atmazdan əvvəl ilk növbədə öz gələcək taleyi ilə bağlı təhlükəsizlik təminatları məsələsində tam və aydın mövqe ortaya qoyulmasını istəyir. Belə bir şəraitdə əgər indiki mərhələdə həmin sənəd imzalansa, bu, Ukrayna üçün faktiki olaraq kapitulyasiya aktı xarakteri daşıyacaq. Təbii ki, rəsmi Kiyev və Prezident Volodimir Zelenski hakimiyyəti buna qarşı çıxır, müqavimət göstərir və hazırkı mərhələdə bu sənədin imzalanmasını Ukrayna üçün sərfəli hesab etmir".
Ayhan
13:00 15.12.2025
Oxunuş sayı: 1524
