Avropanın Rusiya ilə enerji savaşı davam edir: Moskva üçün növbəti sərt sınaq yaxınlaşır - Deputat
Avropa ölkələri Rusiya qazının idxalını dayandırmaq qərarını icra edir. Bu addım regionun enerji təhlükəsizliyi və iqtisadi balansına birbaşa təsir edəcək. Ekspertlər hesab edir ki, Rusiyanın enerji gəlirlərində azalmalar baş verəcək, eyni zamanda Avropa üçün yeni enerji mənbələrinin tapılması vacib olacaq. Region ölkələri isə enerji qiymətlərində dalğalanmalar və tədarük zəncirində dəyişikliklərə hazır olmalıdır. Bu qərar həm siyasi, həm də iqtisadi baxımdan region üçün ciddi çağırışlar yaradacaq.
Mövzu ilə bağlı Milli Məclisin deputatı Vüqar Bayramov Crossmedia.az-a bildirib ki, Moskva üçün Avropa Rusiya qazını ixrac etdiyi əsas bazarlardan biri olub: “Nəzərə alaq ki, Rusiya-Ukrayna müharibəsinə qədər Avropa mavi qaza olan tələbin təxminən yarısını Rusiyadan idxal edirdi. Müharibə başlayandan sonra Brüssel tərəfindən Rusiya qazının əvəzlənməsi üçün sistemli fəaliyyətlər həyata keçirilir. Avropanın Rusiya qazından tamamilə imtina etməsi Rusiyanın dövlət gəlirlərinə mənfi təsir göstərəcək. Eyni zamanda, Rusiyanın mavi qazın idxalı baxımından yeni bazarlar tapmaq imkanları yaranacaq. Rusiyanın dövlət gəlirləri enerji məhsullarının ixracından, o cümlədən mavi qazın satışından birbaşa asılıdır. Praktik olaraq, Rusiyanın enerji məhsullarının qiymətində azalmalar müşahidə olunur ki, bu da dövlət gəlirlərinə təsir göstərəcək. Avropanın Rusiya qazından tamamilə imtina etməsi Rusiya üçün ciddi iqtisadi çağırışlar yaradacaq”.
Zeynəb Xuduyeva
10:03 12.12.2025
Oxunuş sayı: 1236
