Hər şey indi başlayır: Avropa Rusiyaya qarşı hərəkətə keçir
Britaniyanın "The Times" qəzeti hökumət mənbələrinə istinadən məlumat yayıb ki, Avropa ölkələri Rusiya aktivlərinin müsadirə edilməsi ilə bağlı razılığa gəldiklərini bu həftə və ya gələn həftə elan edəcək.
Mənbələrin sözlərinə görə, bu məsələ dekabrın 8-də Londonda Böyük Britaniyanın Baş naziri Kir Starmer, Fransa Prezidenti Emmanuel Makron, Almaniya Kansleri Fridrix Merts və Volodimir Zelenskinin görüşündə müzakirə edilib. Nəşrin məlumatına görə, razılaşma çox yaxındır.
Qəzet iddia edib ki, razılaşma dondurulmuş Rusiya aktivləri hesabına Kiyevə 133 milyard dollar ayrılmasını nəzərdə tutur. Bu vəsaitlər ya hərbi yardım, ya da Ukraynanın bərpası üçün istifadə olunacaq. Dəqiqləşdirilir ki, London 10,6 milyard dollar bərabər olan aktivləri təhvil verəcək.
Avropa Komissiyası dekabrın 18-19-da keçiriləcək sammitdə Avropa İttifaqı ölkələrindən 210 milyard avro həcmində Rusiya aktivlərinin müsadirə edilməsi barədə qərar qəbul etməyə ümid edir.
Bu qərarın icra olunacağı təqdirdə savaşən gedişatlba təsiri barədə Crossmedia.az-a danışan politoloq Natiq Miri bildirib ki, belə bir qərar verilərsə, bu, Rusiyaya vurulan ən böyük zərbə olacaq: "Çünki bu, növbəti illərdə Ukraynanın müharibəni davam etdirə bilməsi üçün nəzərdə tutulur. Bu milyardlar sadəcə Ukrayna əhalisini yeniləmək və təmin etmək üçün verilmir. Bu vəsaitlərin böyük bir hissəsi Ukraynada və Ukraynadan kənarda bu ölkənin hərbi sənaye kompleksinin inkişafını təmin etmək üçün istifadə olunacaq.
Bu isə o deməkdir ki, Ukrayna artıq öz yeni ballistik raketlərini, yəni uzaqmənzilli silahlarını istehsal etmək imkanına malik olacaq. Yeni müasir dronların kütləvi istehsalına başlanacaq ki, bu da müasir müharibədə olmazsa olmazdır. Bu, həmçinin Rusiyanın itkilərinin dəfələrlə artması deməkdir. Çünki perspektiv illərdə Ukrayna bu imkanlara malik olduqca, Rusiyanın dərinliklərindəki enerji sistemlərini, neft emalı zavodlarını və bütün strateji hərbi sənaye müəssisələrini məhv etmək imkanı qazanacaq. Bu isə itkilərin artması və Rusiyanın müharibəni davam etdirmək üçün maliyyəsinin azalması deməkdir. Çünki büdcənin yarısını təşkil edən neft ixracı əhəmiyyətli dərəcədə azalacaq".
Müsahibimiz əlavə edib ki, bu vəsaiti sadəcə yardım kimi düşünmək olmaz: " Bu, perspektiv üçün düşünülmüş, Avropanın Ukraynanın müharibəni davam etdirməsinə imkan tanımasıdır. Eyni zamanda, Avropanın gələcək müdafiəsinə ciddi təlim və hazırlıqdır. Rusiyanın dayandırılması və qalib gəlməsinin qarşısının alınması perspektivdə Avropanın müdafiəsi üçün vacibdir. Bu səbəbdən bu qərar gələcəyə hesablanmış strateji qərar olacaq. Avropa İttifaqı dövlətlərinin bu yöndə tələsməsi və ciddi addımlar atması zəruridir. Çünki Avropanın öz müdafiəsi perspektivdə bu qərardan asılı olacaq".
Fatimə Eynullazadə
10:00 10.12.2025
Oxunuş sayı: 1392
