Politoloq: Rusiya həm hərbi, həm də siyasi baxımdan qalibdir
Rusiya Prezidenti Vladimir Putin son çıxışında Avropa ilə potensial müharibə ehtimalından açıq şəkildə danışaraq beynəlxalq gündəmi yenidən gərginləşdirib. Bu sərt bəyanat Qərb ölkələrində narahatlıq doğurub və Moskvanın əsl niyyətləri barədə sualları artırıb.
Putinin açıqlamalarının məqsədi, hədəf auditoriyası və real təhlükə potensialı barədə Crossmedia.az saytına açıqlama verən politoloq Azad Məsiyev ABŞ və NATO - nun Rusiyanı düşmən elan etdiyini və onun ətrafında gərginlik yaratdığını bildirib : " ABŞ başda olmaqla NATO bloku Rusiyanı düşmən elan edib və bu istiqamətdə onun ətrafında gərgin ocaqlar yaradır. Müxtəlif adlar altında, xüsusilə demokratiya ideyası çərçivəsində rəngli inqilablar həyata keçirilir və Rusiyaya yaxın dövlətlərdə çevrilişlər vasitəsilə Rusiyaya qarşı münasib hakimiyyətlər qurulur. Saakaşvilinin hakimiyyəti dövründəki Gürcüstan, Ermənistan və Ukrayna bunun bariz nümunələridir. Məqsəd Rusiyanı təhlükəyə atmaq, onu dünya siyasi xəritəsindən təcrid etmək, parçalamaq və bir dövlət olaraq təsirsiz hala gətirməkdir.
Bu baxımdan NATO bloku Rusiyanın sərhədlərinə doğru genişlənməkdədir. Rusiya prezidenti dəfələrlə ABŞ rəhbərliyinə və NATO-ya müraciət edərək sərhədlərə doğru irəliləməyə aydınlıq gətirilməsini tələb etmişdir. Təəssüf ki, bu çağırışlara məhəl qoyulmamışdır. ABŞ və NATO Rusiyanı düşmən elan edərək onun təcrid olunmasını hədəfləyir. Nəticədə Ukrayna münaqişəsi yaranmışdır.
Rusiya prezidenti “ən yaxşı müdafiə – hücumdur” prinsipinə əsaslanaraq hərəkət etmişdir. Faktiki olaraq, Ukrayna münaqişəsində Rusiya qalib tərəfdir. Hərbi əməliyyatlar Ukraynanın ərazisində davam etsə də, bu, əslində NATO ilə Rusiya arasında gedən bir müharibədir. NATO faktiki olaraq münaqişəyə hər cür dəstək verir: maliyyə və silah yardımı, kəşfiyyat məlumatları, psixoloji təbliğat, həmçinin hərbi heyət, muzdlular və ya “nayomnik”lər göndərməklə iştirak edir".
Politoloq bildirib ki, beynəlxalq aləmdə Rusiya ilə bağlı qorxuducu təbliğat aparılır və bunun məqsədi Avropa dövlətlərini Ukraynaya daha çox dəstək verməyə təşviq etməkdir: "Beynəlxalq aləmdə isə psixoloji təbliğat aparılır, guya Ukrayna münaqişəsindən sonra Rusiya Avropaya hücum edəcək. Bu, əslində Rusiyanın psixoloji təbliğat strategiyasıdır və Avropa dövlətlərini qorxu altında saxlamaq, onlardan Ukraynaya daha çox dəstək almaq məqsədi daşıyır. Lakin Rusiyanın Avropa üzərinə hücum etməsi real deyil, çünki bu, NATO-nun beşinci maddəsinə əsasən bütün üzvlərə qarşı müharibə demək olar və nəticədə Rusiya üçün ciddi fəsadlar doğura bilər.
Avropa Birliyi və NATO Rusiyanın ətrafında ikinci cəbhə açmağa çalışır. Gürcüstanın baş naziri və prezidenti dəfələrlə etiraf ediblər ki, Avropa Birliyi Gürcüstana təzyiq göstərərək Rusiya ilə ikinci cəbhəni açmaq istəyib. Lakin Gürcüstan milli maraqlarını nəzərə alaraq bu addımı atmayıb. Eyni proses Polşa və Pribaltika ölkələrində də müşahidə olunur. NATO-nun məqsədi Rusiyanın hərbi gücünü zəiflətməkdir, lakin bu avantürist bir yanaşmadır".
O, Rusiyanın böyük nüvə arsenalına malik olduğunu və NATO ilə münaqişəsinin bəşəri fəlakətlərə yol aça biləcəyini vurğulayıb : Rusiya dünyanın ən böyük nüvə arsenalına malikdir. Hər hansı NATO dövləti ilə münaqişəyə girməsi bəşəriyyət üçün fəlakət ola bilər. Rusiya prezidenti açıq şəkildə bəyan edib ki, Avropa dövlətləri ilə müharibə etmək niyyətində deyillər, lakin əgər belə bir münaqişə başlasa, Rusiyanın hazır olduğunu bildirirlər.
Rusiya-Ukrayna münaqişəsində Moskva yalnız öz milli təhlükəsizliyini qorumaq məqsədilə addım atır. NATO-nun sərhədlərə yaxınlaşması Rusiyanın milli təhlükəsizliyinə birbaşa təhlükə yaradır. Təəssüf ki, ABŞ və NATO bu çağırışlara cavab vermədi. Nəticədə Ukrayna alət kimi istifadə edildi və Ukrayna xalqına böyük fəlakətlər gətirildi".
Sonda A. Məsiyev Rusiyanın həm hərbi, həm də siyasi baxımdan qalib olduğunu və şərtlərinin qəbulunun vacibliyini qeyd edib: "ABŞ-nin prezidenti Tramp açıq şəkildə bəyan edib ki, bu münaqişə Baydenin münaqişəsidir. Yəni müharibəni başladan ABŞ və NATO-dur. Faktiki olaraq, Rusiya həm hərbi, həm də siyasi baxımdan qalib tərəfdir və qalib olan tərəfin şərtləri qəbul edilməlidir".
Pərvin Hacıyeva
18:11 06.12.2025
Oxunuş sayı: 2890
