Putin sərt danışdı: Mübaribə davam edəcək
Rusiya Prezidenti Vladimir Putin son açıqlamasında Donbass və Novorossiya əraziləri ilə bağlı qəti və sərt mövqe nümayiş etdirib. O, Moskvanın istənilən halda bu torpaqları “azad edəcəyini” açıqlayaraq, həm Ukrayna, həm də beynəlxalq ictimaiyyət üçün xəbərdarlıq edib. Putin sözlərinə görə, bu addım Rusiyanın strateji maraqları və təhlükəsizlik baxımından vacibdir və bunun üçün bütün zəruri tədbirlər görüləcək.
Mövzu ilə bağlı hərbi ekspert Şair Ramaldanov Crossmedia.az-a verdiyi açıqlamasında qeyd edib ki, Rusiya və Ukrayna ətrafında baş verən proseslər Ukraynanı faciəyə aparan bir istiqamətdə inkişaf edir: ‘’Hal-hazırda Ukraynada gedən siyasi vəziyyət və korrupsiya halları Kiyevi dəstəkləyən beynəlxalq koalisiyanın daxilində birliyin pozulmasına səbəb olub. Bu koalisiyanı idarə edən ABŞ öz mövqeyini ortaya qoyub və Trampın rəhbərliyi ilə Rusiya-Ukrayna arasında atəşkəs və sülh müqaviləsinin imzalanması üçün səylər göstərir. Belə şəraitdə Vaşinqton hər iki tərəfə təzyiq edir, lakin Ukrayna daha zəif tərəf kimi qiymətləndirildiyindən təzyiqlərin əsas ağırlığı Kiyevin üzərinə düşür. Rusiya isə ultimatum xarakterli, demək olar ki, kapitulyasiya şərtlərinə bərabər bir razılaşmanı həyata keçirməyə çalışır. Mövcud geosiyasi vəziyyət də göstərir ki, Ukrayna ətrafında gedən proseslər Rusiyanın öz məqsədlərinə yaxınlaşdığını ortaya qoyur. Donbas və Novorossiya regionlarının işğalının genişləndirilməsi Moskvanın “azad etmə” kimi təqdim etməsinə baxmayaraq, beynəlxalq hüquqa görə bu, işğal kimi qiymətləndirilir. Referendum keçirilməsi və Rusiyanın həmin torpaqları özünə birləşdirməsi beynəlxalq səviyyədə tanınmır. Cəbhə xəttində proseslər tamamilə Rusiyanın xeyrinə inkişaf edir. İşğal sürəti artır, Ukrayna öz ərazilərini daha tez itirir və Rusiyanın hücumlarını dəf etmək imkanları məhduddur. ABŞ isə Biden dövründə qəbul edilmiş qərarlara əsasən silah yardımını davam etdirir, lakin ehtimal olunur ki, gələn ildən bu yardım tamamilə dayanacaq. ABŞ artıq silahları birbaşa göndərmək əvəzinə Avropaya satır və Avropa ölkələri həmin silahları alıb Ukraynaya ötürür. Beləliklə, ABŞ prosesdən kənarda qalmağa çalışır, lakin danışıqlarda aktiv rol oynayır və Avropanın təsir imkanlarını minimuma endirmək niyyətindədir’’.
Ş. Ramaldanov qeyd edib ki, bunun iki səbəbi olduğu düşünülür: ‘’ABŞ istəyir ki, mümkün sülh razılaşmasının müəllifi kimi məhz öz adı tarixə düşsün. Avropa Birliyi rəhbərliyində olan, “müharibə partiyası” kimi tanınan siyasi çevrələr Rusiyanı zəiflətməyin tərəfdarıdır və münaqişənin uzanmasını istəyirlər. Bundan əlavə, bəzi Avropa rəsmilərinin Ukraynada gedən korrupsiya proseslərinə dolayı yolla qarışdığı ehtimalları da gündəmdən düşmür. Güc balansı aspektindən baxıldıqda, əgər Ukrayna bəzi əraziləri könüllü şəkildə boşaltmasa, Rusiyanın həmin torpaqları hərbi yolla ələ keçirmək gücü və imkanı var. Amma bundan sonra Moskvanın hansı şərtləri irəli sürəcəyi, yeni ərazilər işğal etmək istəyib-istəməyəcəyi böyük sual olaraq qalır. Həm də nəzərə almaq lazımdır ki, Ukraynanın əsas müdafiə mövqeləri, gücləndirilmiş sədləri məhz Donbass və Novorossiya ərazilərində idi. Onlar itirildikdən sonra Ukraynanın müdafiə qabiliyyəti daha da zəifləyəcək. Bu vəziyyətdə Rusiyanın ölkənin dərinliklərinə sürətlə daxil olması və Ukraynanın bir dövlət kimi mövcudluğunu sual altına qoyması ehtimalı artır. Məhz buna görə Tramp bu prosesin qarşısını almaq üçün müharibəni dayandırmaq istəyir. Bugünkü ağır Rusiya şərtləri Moskvanın öz hədəflərinə çatmağa çox yaxın olduğunu göstərir. ABŞ-nin yardımlarını minimuma endirməsi, Avropa Birliyindəki parçalanma və anti-Rusiya koalisiyasının zəifləməsi də Moskvanın mövqeyinə əlavə güc verir. Bütün bunları nəzərə alanda, proseslərin məhz bu istiqamətdə inkişaf etmə ehtimalı gündən-günə artır’’.
Sevinc Yarməmmədova
17:25 04.12.2025
Oxunuş sayı: 2131
