Şərqi Avropada diplomatik dönüş: Müharibə bitir?
Ukraynanın Milli Təhlükəsizlik və Müdafiə Şurasının katibi Rüstəm Umerov qeyd edib ki, Ukraynanın ABŞ heyətləri arasında sülh planının əsas şərtləri üzrə anlaşma əldə olunub.
Sabah ABŞ-də keçiriləcək görüşlər də müharibənin yaxın zamanda bitəcəyinə dair ümidləri artırır. Bunu baxmayaraq, o da aydındır ki, Vaşinqtonun şərtlərinə razı olmaq Kiyev üçün məğlubiyyətdir. Deməli, Prezident Volodimir Zelenski hakimiyyəti faktiki olaraq pislə ən pis arasında qalıb.
Bu barədə Crossmedia.az-a siyasi şərhçi Xasay Gəraylı açıqlama verib:
"ABŞ ilə Ukrayna arasında sülh planı üzrə şərtlərin razılaşdırılması barədə son günlər verilən açıqlamalar müharibənin gedişatında mühüm diplomatik dönüş kimi qiymətləndirilir. Ukraynanın Milli Təhlükəsizlik Şurasının katibi Rüstəm Umerovun sözlərinə görə, tərəflər artıq ortaq məxrəcə gəlib və bu, 2022-ci ildən bəri hərbi müstəviyə fokuslanan prosesin diplomatik mərhələyə keçidini göstərir.
Ukrayna əvvəlki mövqelərindən müəyyən qədər uzaqlaşıb və mövcud şərtlərlə razılaşmağa hazır görünür".
Siyasi analitik vurğulayıb ki, bu dəyişiklik həm ölkənin daxili siyasətinə, həm də xarici diplomatik münasibətlərinə ciddi təsir edə bilər: "Qərbi Avropa ölkələri — Almaniya, Fransa və İtaliya — sülh təşəbbüsünü dəstəkləməyə hazır olduqlarını bildiriblər. Lakin Polşa və Baltikyanı ölkələr Ukraynanın mümkün ərazi güzəştlərinə ehtiyatla yanaşırlar. Onlar öz təhlükəsizlikləri üçün də risk gördüklərini vurğulayırlar. Böyük Britaniya isə məsələdə sərt mövqeyini qoruyur".
O qeyd edib ki, ABŞ və Ukrayna arasında razılıq əldə olunduğu təqdirdə Avropanın böyük bir hissəsi prosesi qəbul etməyə hazır olacaq: "Sülh əldə edildiyi halda Rusiyanın yeni geosiyasi reallığı qəbul etməsi, beynəlxalq sanksiyaların mərhələli yumşalması, ABŞ-nin Şərqi Avropada hərb mövcudluğu artacağı, enerji və ərzaq bazarında stabilliyin yaranması, Avropa iqtisadiyyatı "rahatlamağa" başlaması gözlənilir".
Analitikin fikrincə, razılaşmanı müharibənin diplomatik yolla həlli istiqamətində atılmış ən ciddi addım kimi dəyərləndirmək olar.
Mehriban İbrahimli
17:42 29.11.2025
Oxunuş sayı: 1326
