Avropa minnətçi düşdü - Türk ordusu bu ölkəyə göndərilir
Ukraynada sülhməramlı missiya ilə bağlı yayılan məlumatlar fonunda Ankara mövqeyini açıqlayıb. Türkiyə Milli Müdafiə Nazirliyi məsələ ətrafında yaranan suallara aydınlıq gətirərək bildirib ki, bölgədə sülh və təhlükəsizliklə bağlı müzakirələr gündəmə gələn hər zaman ilk növbədə Türkiyə Silahlı Qüvvələrinin adı çəkilir. Nazirliyin mətbuat xidmətinin rəhbəri Zeki Aktürk qeyd edib ki, bu, Türk ordusunun dayandırıcı gücünün, regional nüfuzunun və operativ imkanlarının nəticəsidir. Onun sözlərinə görə, Türkiyə Silahlı Qüvvələri bölgədə sabitliyi təmin etməyə yönəlmiş istənilən təşəbbüsə töhfə verməyə hazırdır. Əgər Ukraynada türk orduları yerləşdirilərsə, regionda vəziyyət necə dəyişər?
Mövzu ilə bağlı Turk-İslam Araşdırmaları Mərkəzinin rəhbəri, doç.dr. Telman Nüsrətoğlu Crossmedia.az-a verdiyi açıqlamasında bildirib ki, Türkiyə Müdafiə Nazirliyinin açıqlamasında xüsusi vurğulandığı kimi, Türk ordusu həm yüksək hərbi qabiliyyəti, həm də sülhməramlı qüvvə kimi dünyanın müxtəlif bölgələrində formalaşdırdığı zəngin təcrübəsi ilə bu kimi məqamlarda ilk ağla gələn aktorlardan biridir: “Türkiyə Ukrayna-Rusiya məsələsində tərəfsizlik siyasəti yürüdüb, mümkün olduğu qədər balanslı mövqe nümayiş etdirərək müharibənin başlamaması üçün diplomatik təşəbbüslər göstərib. Hətta müharibənin ilk dövrlərində İstanbulda başlayan danışıqlar prosesi vardı və bu proses müəyyən mənada sülhə yaxınlaşma yaratmışdı. Təəssüf ki, sonradan bəzi qüvvələrin müdaxiləsi ilə bu imkan əldən çıxdı. Türkiyə bu məsələdə həm Ukraynanın Qara dəniz ölkəsi olaraq təhlükəsizliyini, həm də Rusiya ilə sabit münasibətlərin qorunmasını nəzərdə tutan tərəfsiz mövqe tutur. Bununla yanaşı, ərazi bütövlüyü məsələsində, xüsusilə Krım mövzusunda tam şəkildə Ukraynanın mövqeyini dəstəkləyir və Krım türklərinin hüquqlarını müdafiə edir. Bu mənada Türkiyənin Ukrayna-Rusiya münasibətlərinə yanaşması konseptual və uzunmüddətli xarakter daşıyır’’.
Politoloq qeyd edib ki, gələcəkdə ciddi bir sülh razılaşması əldə olunarsa və beynəlxalq missiyanın bölgəyə göndərilməsi zərurəti yaranarsa, həm Rusiya, həm Ukrayna, həm də ABŞ və digər ölkələrin razılığı ilə Türkiyənin də öz öhdəsinə düşəni yerinə yetirəcəyi gözləniləndir: “Lakin bu təşəbbüsün Fransa Prezidenti Makrondan gəldiyi nəzərə alınsa, Fransanın uzun illərdir həm Türkiyənin, həm Azərbaycanın, həm də ümumilikdə türk dünyasının maraqlarına qarşı siyasət yürütməsi də unudulmamalıdır. Şərqi Aralıqdan tutmuş Yaxın Şərqə qədər atdıqları addımların sonda uğursuzluqla nəticələndiyi də məlumdur. Onların gündəmə gətirdiyi variant Türk ordusunun İngiltərə və Fransız qüvvələri ilə birlikdə bölgədə olmasıdır. Bu tamamilə qəbul olunası bir model deyil. Belə bir qərar Türkiyənin müstəsna hüququdur və yalnız Ankara özü lazım bildiyi halda belə bir missiyada iştirak edər. Avropa İttifaqı və ya Fransanın hansısa təklifi ilə bu proses baş tutmayacaq. Bu məsələ Türkiyənin milli maraqları və xarici siyasət konsepsiyası çərçivəsində qiymətləndirilməlidir’’.
Sevinc Yarməmmədova
19:00 27.11.2025
Oxunuş sayı: 1244
