TDT QHT-lərinin Platformasının sədri perspektiv və məqsədləri açıqladı - Müsahibə
Türk dünyasında vətəndaş cəmiyyəti institutları arasında əməkdaşlığın yeni strateji mərhələsi rəsmən başlayıb. Türk Dövlətləri Təşkilatına üzv ölkələrin qeyri-hökumət təşkilatlarını bir araya gətirəcək vahid platformanın təsis olunması regional həmrəylik siyasətində mühüm dönüş nöqtəsi kimi qiymətləndirilir. Bu addım türk inteqrasiyasının mövcud mexanizmlərini daha da gücləndirir, ictimai diplomatiyanın institusional əsaslarını genişləndirir və QHT-lərarası əlaqələrin sistemli şəkildə koordinasiyasını təmin edir. Katibliyin Bakıda yerləşməsi isə Azərbaycanın türk dünyasında oynadığı liderlik rolunun növbəti təsdiqi olmaqla yanaşı, yeni qurumun fəaliyyətində mərkəzi mövqeyini önə çəkir. Qərarın məhz Naxçıvanda – Türk Dövlətləri Təşkilatının təməl qərarının qəbul edildiyi məkanda açıqlanması bu prosesin tarixi simvolikasını daha da gücləndirir və yeni mərhələnin başlanğıcına xüsusi məna qatır.
Mövzu ilə bağlı Milli Məclisin deputatı Azər Allahverənov Crossmedia.az-a müsahibə verib:
- Azər müəllim, yeni vəzifənizin əhəmiyyəti ilə bağlı nə deyə bilərsiniz?
- Yaradılan bu yeni struktur türk dünyası üçün strateji baxımdan son dərəcə önəmli qərarın nəticəsidir. Türk Dövlətləri Təşkilatına üzv ölkələrin qeyri-hökumət təşkilatları arasında belə bir institusional yeniliyin reallaşması, əslində, bu günün şərtlərindən irəli gələn zərurətdir. 25 noyabr tarixində TDT-yə üzv ölkələrin qeyri-hökumət təşkilatlarının Həmrəylik Forumunda qəbul edilən qərarla QHT-ləri birləşdirəcək vahid platforma yaradıldı və həmin struktura xidmət edəcək katibliyin Bakıda yerləşdirilməsi rəsmən təsdiqləndi. Bu, sözün əsl mənasında tarixi hadisədir.
- Bu platforma TDT QHT-lərinə hansı töhfəni verəcək?
- Platformanın fəaliyyətinin əsas məqsədləri türk dövlətlərini əhatə edən QHT-lər arasında əlaqələrin gücləndirilməsi, institusional və konseptual inkişafın təmin olunması, təcrübə mübadiləsi, təlimlərin təşkili və geniş spektrli əməkdaşlığın koordinasiyasıdır. Türk Dövlətləri Təşkilatının qəbul etdiyi qərarlarda ictimai diplomatiya ilə bağlı mühüm komponentlər var və həmin istiqamətlərin icrası birbaşa olaraq bu platforma vasitəsilə həyata keçiriləcək.
- Platformanın gələcəyi və perspektivləri barədə nə deyə bilərsiniz?
- Strukturun fəaliyyəti, əlaqələndirmə mexanizmləri və digər məsələlər üzərində işlər artıq davam etdirilir. Artıq müəyyən olunub ki, katiblik Bakıda yerləşəcək və bu quruma rəhbərlik mənə həvalə olunub. Fəaliyyət planı məhz TDT-nin qərarları əsasında formalaşdırılacaq. Hər ölkə üzrə əlaqələndirici şəxslər müəyyən ediləcək və katiblik onlarla birlikdə bu işləri təşkil edəcək. Bir məqamı da qeyd etmək vacibdir: hazırda təşkilatın sədrlik funksiyası Azərbaycana məxsusdur və buna görə baş katib vəzifəsi də Azərbaycan nümayəndəsinə – mənə həvalə edilib. Lakin ən önəmlisi odur ki, platformanın katibliyinin daimi olaraq Bakıda fəaliyyət göstərəcək mərkəz kimi müəyyən edilməsi artıq rəsmən bəyan edilib. Bu qərar həm ölkəmizin QHT sektorunun, həm də bütövlükdə türk dünyasında vətəndaş cəmiyyətlərinin inkişafına güclü təkan verəcək.
Nigar Yahyazadə
12:10 27.11.2025
Oxunuş sayı: 1181
