Putin atəşkəsə razılıq verə bilər, amma...- Politoloq
Ukrayna–ABŞ münasibətlərinin yeni mərhələyə qədəm qoyduğu, müharibənin gedişində diplomatik təşəbbüslərin intensivləşdiyi bir vaxtda iki ölkə liderləri arasında mümkün görüş ətrafında aparılan hazırlıqlar beynəlxalq gündəmin əsas mövzularından birinə çevrilib. Kiyev və Vaşinqtonun sülh prosesinin irəlilədilməsi istiqamətində səylərini gücləndirdiyi bir şəraitdə Ukrayna Prezident Administrasiyasının rəhbəri Andrey Yermakın açıqlamaları yaxın günlərdə mühüm siyasi hadisənin baş verə biləcəyinə işarə edir.
Onun sözlərinə görə, Prezident Volodimir Zelenski ilə ABŞ Prezidenti Donald Tramp arasında planlaşdırılan görüş yalnız iki ölkə arasındakı tərəfdaşlığın gündəlik məsələləri baxımından deyil, həm də Ukrayna–Rusiya müharibəsinin mümkün sülh sazişi üzrə danışıqlarında dönüş nöqtəsi kimi dəyərləndirilir. Vaşinqtonun Şükranlıq günündən əvvəl Trampın sülh planını imzalamağa hazırlaşması barədə yayılan məlumatlar da gözləntiləri daha da artırır.
Bu görüşün noyabrın 27-də baş tuta biləcəyi ehtimalı isə tərəflərin prosesə nə qədər ciddi yanaşdığını və danışıqları “mümkün qədər tez” reallaşdırmaq istəyini bir daha ortaya qoyur.
Məsələ ilə bağlı politoloq Elxan Şahinoğlu Crossmedia.az-la öz fikirlərini bölüşüb: "28 maddədən ibarət, Vaşinqton tərəfindən hazırlanmış həmin plan müzakirəyə çıxarılacaq. Lakin Kiyevin bu planı olduğu kimi qəbul etməsi mümkün deyil,. Çünki sənədin bir sıra maddələri Rusiya maraqlarına xidmət edir. Məhz buna görə də Cenevrədə danışıqlar aparılıb və Kiyev bəzi bəndlərin çıxarılmasına nail olub. Yəni müzakirələr məhz bu planın ətrafında gedəcək. Tramp atəşkəsin tərəfdarıdır, çünki müharibə davam etdiyi şəraitdə münaqişəni tam həll etmək mümkün deyil. Zelenski də əslində atəşkəsin əleyhinə deyil. Putin atəşkəsə razılıq verə bilər. O, Trampın planını müzakirə etməyə hazır olduğunu bəyan edib. Lakin sənədə edilən dəyişikliklərdən sonra Rusiya bu planı qəbul etməyə də bilər".
Politoloq, həmçinin Zelenski ilə Tramp arasında görüşdə ciddi fikir ayrılıqları olacağının olmayacağını qeyd edib: "Əsas çətinlik Rusiyanı razı salmaqdır. Prosesin sonuna yaxın Putinin razılaşacağı və ya atəşkəsin mümkün ola biləcəyi ehtimal olunur. Lakin Putinin razılıq verməsi üçün ən azı atəşkəs variantı gündəmdə qalmalıdır. Hazırda Putin Donbasın tam işğalına nail ola bilmir. Əgər tam nəzarəti ələ keçirsəydi, bəlkə, onda atəşkəsə razılaşardı. Çünki Donetsk və Luqansk vilayətlərinin böyük hissəsi Rusiya tərəfindən işğal edilsə də, müəyyən ərazilər hələ də Ukrayna ordusunun nəzarətindədir".
Elmir Heydərli
12:03 26.11.2025
Oxunuş sayı: 1001
