Azərbaycanda keçirilən D-8 Media Forumu ölkə jurnalisikası nə vəd edir? - ŞƏRH
Qlobal informasiya məkanında dinamikanın sürətlə dəyişdiyi bir dövrdə media qurumları arasında əməkdaşlığın gücləndirilməsi, doğru və operativ məlumat mübadiləsinin təmin edilməsi artıq regional təhlükəsizlik və davamlı inkişaf baxımından strateji əhəmiyyət kəsb edir. Məhz bu çağırışlar fonunda sabah Bakıda D-8 İqtisadi Əməkdaşlıq Təşkilatına üzv dövlətlərin media sahəsinə məsul qurumlarının rəhbərlərinin, aparıcı media institutlarının təmsilçilərinin və tanınmış ekspertlərin iştirakı ilə “Dialoqun, əməkdaşlığın və regional həmrəyliyin təşviq edilməsi” mövzusunda D-8 Media Forumunun keçirilməsi xüsusi önəm daşıyır.
Medianın İnkişafı Agentliyinin (MEDİA) təşkilatçılığı ilə baş tutacaq bu forum, təkcə region ölkələri arasında informasiya körpüsünün möhkəmləndirilməsi üçün platforma deyil, həm də media sahəsinin çağdaş problemlərinin kollektiv müzakirə olunduğu, yeni ideyaların və innovativ həllərin formalaşdığı strateji bir əməkdaşlıq meydanıdır. Tədbir çərçivəsində dezinformasiyaya qarşı birgə mübarizə mexanizmlərinin yaradılması, rəqəmsal mediada əməkdaşlıq hüdudlarının genişləndirilməsi, təcrübə mübadiləsinin institusional səviyyədə gücləndirilməsi kimi məsələlər gündəmdə olacaq.
Eyni zamanda təşkil olunacaq panel sessiyalar və xüsusi vörkşoplar media etikası, rəqəmsal innovasiya, strateji kommunikasiya və böhranların idarə olunması kimi sahələrdə yeni baxışların formalaşmasına, iştirakçı ölkələr arasında qarşılıqlı anlaşmanın və peşəkar birliyin daha da möhkəmlənməsinə xidmət edəcək. Forumun 8 ölkədən və Təşkilat Katibliyindən 71 xarici nümayəndə daxil olmaqla 150-yə yaxın qonağı bir araya gətirməsi isə tədbirin geniş miqyasını və yüksək beynəlxalq əhəmiyyətini nümayiş etdirir.
Mövzu ilə bağlı Bakı Dövlət Universitetinin Multimedia və elektron kommunikasiya kafedrasının müdiri, professor Qulu Məhərrəmli Crossmedia.az-la öz fikirlərini bölüşüb:
"Belə tədbirlərin keçirilməsi ilk növbədə beynəlxalq diqqətin Azərbaycana yönəldilməsinə xidmət edir. İkincisi, həm dünyada, həm də ölkə daxilində informasiya mühitinin diqqət mərkəzinə gətirilməsi baxımından mühüm əhəmiyyət daşıyır. Üçüncü və ən önəmli məqamlardan biri isə Azərbaycan jurnalistlərinin beynəlxalq aləmlə və qlobal media sistemi ilə təcrübə mübadiləsi aparmaq imkanı qazanmasıdır.
Ekspert, həmçinin bu baxımdan burada həm bizim medianın öyrənə biləcəyi, həm də öyrədə biləcəyi çox məqamların olduğunu bildirib: "Belə tədbirlərin Azərbaycanda təşkili, şübhəsiz ki, ölkəmizdə media mühitinin daha da zənginləşməsinə və inkişafına töhfə verir”.
Elmir Heydərli
18:39 21.11.2025
Oxunuş sayı: 1864
