Ukraynaya qarşı təzyiq kampaniyasının güclənir - ŞƏRH
Avropa siyasi gündəminin ən həssas və mübahisəli mövzularından biri olan Ukraynaya maliyyə dəstəyi ətrafında yeni gərginliklər formalaşmaqdadır. Xüsusilə də korrupsiya iddialarının geniş vüsət aldığı bir dövrdə bu məsələ Aİ daxilində ciddi narahatlığa səbəb olur. Brüsseldə keçirilən Xarici İşlər Şurasının iclası öncəsi Macarıstanın xarici işlər və xarici ticarət naziri Peter Siyartonun səsləndirdiyi sərt fikirlər isə bu müzakirələrə əlavə dinamika qatıb. Onun korrupsiya qalmaqalının fonunda Ukraynaya ayrılan maliyyə axınlarının dərhal dayandırılması və genişmiqyaslı auditin aparılması ilə bağlı çağırışı Aİ daxilində fikir ayrılıqlarının nə dərəcədə dərinləşdiyini bir daha nümayiş etdirir. Nazirin Avropa Komissiyası rəhbərliyinə, xüsusilə də Ursula fon der Lyayenin üzv dövlətlərə Ukraynaya növbəti iki il üçün əlavə maliyyə vəsaiti ayırmaqla bağlı müraciətinə yönəltdiyi kəskin tənqidlər Aİ-nin mövcud siyasət mexanizmləri və büdcə öhdəlikləri barədə yeni müzakirələri gündəmə gətirir. Bu açıqlamalar həm Avropa vergi ödəyicilərinin narahatlıqlarını əks etdirir, həm də təşkilat daxilində Ukrayna ilə bağlı vahid mövqeyin formalaşdırılmasının nə qədər çətin olduğunu göstərir.
Mövzu ilə bağlı politoloq Zeynal Əmrəliyev Crossmedia.az-la öz fikirlərini bölüşüb:
"Macarıstanın Ukrayna məsələsindəki mövqeyi artıq yaxşı məlumdur. Viktor Orban hökuməti faktiki olaraq bu məsələdə açıq şəkildə Rusiyanın tərəfini tutur. Hazırda Ukraynada davam edən korrupsiya qalmaqalları isə görünür ki, Budapeşt tərəfindən müəyyən siyasi alət kimi istifadə olunur və Macarıstan bu vəziyyətdən yararlanmaq niyyətindədir. Bu isə belə bir sual yaradır: Avropa İttifaqı Macarıstanın irəli sürdüyü bu tələbləri qəbul edəcəkmi? Bunun ehtimalı olduqca zəifdir. Çünki Avropa İttifaqı ilə Macarıstan arasında hazırda ciddi fikir ayrılığı mövcuddur və İttifaqın Budapeştin mövqeyi ilə razılaşacağı inandırıcı görünmür. Bununla yanaşı, Ukraynada korrupsiya faktlarının olması istisna edilmir. Son dövrlərdə Qərb mediasında yayılan materiallar da Ukraynada korrupsiyanın artması ilə bağlı narahatlıqları təsdiqləyir. Təsadüfi deyil ki, Ukrayndada Prezident Volodimir Zelenskinin komandasının bir sıra əsas üzvləri məhz korrupsiya qalmaqallarına görə vəzifədən uzaqlaşdırılıblar.Məsələn, Prezident Administrasiyasının rəhbəri Andrey Yermakın gözlənilən istefası da məhz bu səbəblərlə əlaqələndirilir. Bəli, korrupsiya halları mümkündür, lakin Zelenski komandası daxilində bu məsələlərin ciddi şəkildə təmizlənməsi, araşdırmaların şəffaf aparılması vacibdir. Ukraynada korrupsiya faktları üzrə genişmiqyaslı istintaq tədbirləri həyat keçirilməlidir".
O bildirib ki, bütün bunlardan sonra Avropa İttifaqının Kiyevə qarşı müəyyən tələblər irəli sürməsi mümkündür: "Xüsusilə də maliyyə məsələləri ilə bağlı daha sərt nəzarət tələb oluna bilər. Çünki Ukrayna son vaxtlar ABŞ-də “Əməkdaşlıq və Sülh Sazişi”nin imzalanması istiqamətində aktiv danışıqlar aparır və məlum olub ki, Trampın təklif etdiyi plan Ukrayna üçün heç də tamamilə qəbuledilməz deyil. Bu faktlar ittifaqında müəyyən şərtlərini irəli sürməsi ehtimalını artırdığını qeyd edib. Çünki İttifaq daxilində bəzi ölkələr müharibənin Trampın təklif etdiyi şərtlərlə dayandırılmasını istəmir. Bu halda Moskvanın və Putinin mövqeyi güclənə bilər ki, bu da Avropa dövlətlərinin maraqlarına uyğun deyil. Odur ki, Ukraynaya qarşı təzyiq kampaniyasının güclənməsi mümkündür".
Elmir Heydərli
12:23 21.11.2025
Oxunuş sayı: 2092
