Rusiya ilə bağlı mühüm qərar: Tramp məsləhətçilərinin tövsiyəsi ilə...
Son günlər Rusiya ilə ABŞ arasında münasibətlərin gərginləşməsi fonunda Rusiya xarici işlər naziri Sergey Lavrovun “Kiyevə Tomahawk’ raketlərinin tədarükü Rusiya-ABŞ münasibətlərinə böyük zərbə vuracaq” açıqlaması beynəlxalq gündəmin əsas mövzularından birinə çevrilib. Bu bəyanat, iki ölkə arasında onsuz da gərgin olan diplomatik münasibətlərin daha da pisləşə biləcəyi barədə ciddi siqnal kimi qiymətləndirilir. Lakin Rusiya-ABŞ münasibətlərinin pisləşməsinə tək səbəb “Tomahawk” raketlərinin Ukraynaya verilməsi deyil. Bu, uzun illərdir davam edən strateji qarşıdurmanın, qarşılıqlı ittihamların və geosiyasi maraqların toqquşmasının növbəti mərhələsidir.
Mövzu ilə bağlı politoloq Natiq Miri Crossmedia.az-a açıqlama verib:
“Lavrovun bu açıqlaması “Tomahawk” raketlərinin nə qədər ciddi təhlükə yaratdığı ilə bağlıdır. Rusiya tərəfi bu məsələni olduqca narahatedici hesab edir. Çünki bu raketlər yüksək dəqiqliyə malikdir və onların qarşısını almaq Moskva üçün çətinlik yaradır. Əgər “Tomahawk” raketlərinin yeni modifikasiyası Ukraynaya verilərsə, bu, Rusiyanın strateji, hərbi və enerji infrastrukturuna qısa müddətdə ciddi zərbə vura bilər. Məhz buna görə də Moskvanın narahatlığı artıb. Lavrovun açıqlaması da bu narahatlığın davamıdır və bu, təkcə onun tərəfindən deyil, daha əvvəl Rusiya Prezidenti Vladimir Putin tərəfindən Valday Forumunda, ardınca Kremlin sözçüsü Dmitri Peskov və indi isə Lavrov səviyyəsində təkrarlanıb. Hətta Rusiya Təhlükəsizlik Şurasının sədr müavini Dmitri Medvedev də bu məsələ ilə bağlı Jirinovskiyə xas, təhdid dolu açıqlamalar səsləndirib. Bütün bunlar onu göstərir ki, “Tomahawk” raketlərinin Ukraynaya verilməsi Rusiyada ciddi reaksiyaya səbəb olub və bu, Moskvanın qorxularını açıq şəkildə nümayiş etdirir. Rusiya rəhbərliyi belə təpkilərlə ABŞ-ni, xüsusilə də Prezident Donald Trampı fikrindən daşındırmağa çalışır. Tramp bu istiqamətdə konkret qərar verməyib və sabah onun Ukrayna Prezidenti Volodimir Zelenski ilə görüşü planlaşdırılır. Trampın açıqlamalarına əsasən, Zelenski görüş zamanı “Tomahawk” raketlərinin verilməsini xahiş edəcək. Lavrovun son açıqlamaları isə məhz bu görüş ərəfəsində səsləndirilib və məqsəd Trampı bu qərardan döndərməkdir”.
Politoloq qeyd edib ki, Trampın siyasətində ardıcıllığın olmaması da bu məsələdə xüsusi rol oynayır: “O, tez-tez bir gün dediyini ertəsi gün təkzib edir. Buna görə də onun ilkin bəyanatlarına əsaslanmaq doğru deyil. Adətən Ağ Ev rəhbəri sonradan məsləhətçilərinin yönləndirməsi ilə daha real və düşünülmüş qərarlar verir. Rusiya da buna ümid edir və hesab edir ki, hələlik yekun qərar verilmədiyi üçün bu cür təhdid xarakterli açıqlamalarla Trampı fikrindən daşındırmaq mümkündür. Lavrovun çıxışı əslində Rusiyanın son cəhdlərindən biridir. Putin və Tramp arasında telefon danışıqları planlaşdırılmadığından, Moskva bu mesajları məmurlar səviyyəsində verməyə üstünlük verir. Əlbəttə, “Tomahawk” məsələsi təkcə simvolik deyil, real hərbi nəticələr doğura bilər. Rusiya hər nə qədər bu silahların müharibənin gedişinə təsir etməyəcəyini iddia etsə də, bu, həqiqəti əks etdirmir. Əgər bu raketlər təsirsiz olsaydı, Moskva bu qədər narahat olmazdı. Rusiya hər gün Ukraynanın şəhərlərinə və enerji infrastrukturlarına yüzlərlə dron və raket zərbəsi endirir. Lakin Ukrayna eyni addımı atmağa çalışanda Rusiya dərhal etiraz səsini qaldırır. Bu da onu göstərir ki, “Tomahawk” raketləri həqiqətən ciddi təhlükə yaradır".
Onun sözlərinə görə, bu silahlar Rusiyanın dərinliklərində yerləşən hərbi və sənaye obyektlərini, strateji qərarverici mərkəzləri və enerji infrastrukturlarını məhv etmək gücünə malikdir: "Bu isə Ukraynaya döyüş meydanında əlavə üstünlüklər qazandıra bilər. Eyni zamanda, Trampın Rusiya və xüsusilə də Putinlə bağlı mövqeyinin dəyişməsi də Moskvanı narahat edir. Əgər əvvəllər Tramp Ukrayna rəhbərliyinə sülh danışıqlarına getməyi tövsiyə edirdisə, indi Ukraynanın müdafiə qabiliyyətinin gücləndirilməsindən, hətta işğal olunmuş ərazilərin, o cümlədən Krımın azad edilməsindən danışılır. Bu, Rusiyanın narahatlığını daha da artırır. Çünki bir müddət əvvəl Alyaskada keçirilən görüşə qədər Trampun bəyanatları əsasən Rusiyanın maraqlarına uyğun idi. Lakin Moskva bu vəziyyətdən düzgün istifadə edə bilmədi və indi proses artıq Rusiyanın xeyrinə getmir. Zaman da Rusiyanın lehinə işləmir və bu, narahatlığın əsas səbəblərindən biridir”.
Ayhan
20:46 16.10.2025
Oxunuş sayı: 1455
