Şərqi Avropada hərbi gərginlik artır: NATO və Rusiya "Kəllə-kəlləyə" gəlir
Şərqi Avropada hərbi və geosiyasi vəziyyət diqqət mərkəzində qalır. NATO bloku regionun şərq cinahında öz hərbi iştirakını artırmağa davam edir, Rusiya və Belarus isə sərhədlərində təlim-döyüş və kəşfiyyat fəaliyyətlərini intensivləşdirib. Rusiya Müdafiə Nazirliyinin məlumatına görə, bu tədbirlər təxminən 60 min NATO hərbçisinin iştirak etdiyi təlimləri əhatə edir. Eyni zamanda, Moskva və Minsk müdafiə sahəsində əməkdaşlığını genişləndirməyi planlaşdırır və 2026–2030-cu illər üçün strateji hərbi tərəfdaşlıq proqramının təsdiqlənməsi gözlənilir.
Mövzu barədə Crossmedia.az-a danışan hərbi ekspert Ədalət Verdiyev bildirib ki, NATO-nun Şərq cinahında hərbi iştirakın artırılması və kəşfiyyat fəaliyyətlərinin gücləndirilməsi birbaşa Rusiya-Ukrayna müharibəsi ilə bağlıdır. “Rusiya artıq dəfələrlə NATO ölkələrini, xüsusilə Şərqi Avropada yerləşən və daha əvvəl Varşava Paktına daxil olan ölkələri, Ukraynaya silah və maliyyə yardımı göstərdiklərinə görə təhdid edib. Bu təhdidlər hazırda da davam edir”.
Ə.Vərdiyev həmçinin qeyd edib ki, Azərbaycan milli və regional təhlükəsizlik məsələlərini daim prioritet hesab edir və bu istiqamətdə uğurlu addımlar atır: "Eyni gündə Azərbaycan Xəzər dənizində İranla birgə təlimlər keçir, paralel olaraq isə Türkiyə, Gürcüstan və Azərbaycan arasında 2025-ci il komanda qərargah təlimləri davam edir. Azərbaycan sülh və təhlükəsizliyə töhfə verəcək istənilən platformada iştirak etməyə hazırdır, lakin prioritet olaraq ənənəvi müttəfiqlərimizə və Türk Dövlətləri Təşkilatı çərçivəsində fəaliyyətlərimizə üstünlük veririk”.
Mehriban Yariyeva
20:41 16.10.2025
Oxunuş sayı: 1131
