BDU-da “İƏT Beynəlxalq Münasibətlər Akademiyası – 2025” layihəsinin açılış mərasimi keçirilib
Bakı Dövlət Universitetində (BDU) “İƏT Beynəlxalq Münasibətlər Akademiyası – 2025” layihəsinin açılış mərasimi keçirilib.
Universitetdən Crossmedia.az-a bildirilib ki, İslam Əməkdaşlıq Təşkilatı Gənclər Forumunun Avrasiya Regional Mərkəzi (İƏTGF Avrasiya Regional Mərkəzi), Gənclər və İdman Nazirliyi və Bakı Dövlət Universitetinin (BDU) birgə tərəfdaşlığı ilə həyata keçirilən layihədə iştirak etmək üçün 15-dən artıq ali təhsil müəssisəsindən 600-dən çox gənc müraciət edib. Onların arasından mövzuya uyğun bilikləri və xarici dil bacarıqları ilə fərqlənən 100 gənc seçilib.
BDU-da keçirilən açılış mərasimində universitetin rektoru Elçin Babayev, İƏTGF Avrasiya Regional Mərkəzi İdarə Heyətinin sədri Elçin Əsgərov, Gənclər və İdman Nazirliyinin Gənclərlə iş şöbəsinin müdiri Ramil Cabbarov çıxış ediblər. Çıxışlarda İƏT Modeli layihəsinin əhəmiyyəti, onun İslam ölkələrinin gəncliyinin inkişafındakı rolu, Azərbaycan gənclərinin dünya arenasında təmsilçiliyinə verdiyi töhfələr vurğulanıb.
Sonra Mərakeş Krallığının Azərbaycan Respublikasındakı səfiri Məhəmməd Adil Embarş “Qlobal məsələlərdə beynəlxalq təşkilatların rolu: Mərakeşin xarici siyasət prioritetləri və Azərbaycanla əlaqələr” mövzusunda çıxış edib.
Qeyd edək ki, 6 həftə ərzində davam edəcək İƏT Modeli Beynəlxalq Münasibətlər Akademiyası çərçivəsində İƏT ölkələrini Azərbaycanda təmsil edən diplomatik missiya rəhbərlərinin, azərbaycanlı rəsmilərin və sahə üzrə ekspertlərin beynəlxalq münasibətlər, dövlət quruculuğu, İslam sivilizasiyası, İƏT-in dünyada rolu, milli dövlətçiliyin əsasları və digər aktual mövzular üzrə məruzələri dinləniləcək.
Bununla yanaşı, layihə çərçivəsində Azərbaycanın 5 ali təhsil müəssisəsində müxtəlif İƏT ölkələrini təmsil edən Xarici İşlər nazirliklərinin, yekun mərhələdə İƏT Xarici İşlər Nazirləri toplantısının simulyasiya konfransları keçiriləcək. Simulyasiya konfransında münsiflər heyətinin qərarı ilə xarici dil qabiliyyəti və xüsusi yaradıcılıq bacarığı ilə seçilən tələbələr “Beynəlxalq İƏT Modeli” yarışmasında Azərbaycanı təmsil etmək hüququ qazanacaqlar.
Xatırladaq ki, İƏT Modeli proqramının əsas məqsədləri İƏT məkanında gənclərin beynəlxalq əməkdaşlığının güclənməsinə dəstək vermək, gənclər təşkilatları rəhbərləri və üzvlərinin diplomatiya, idarəetmə, kommunikasiya sahələrində yeni bilik və təcrübə əldə etməsinə yardım etməkdir.
Ötən illər ərzində azərbaycanlı tələbələr dəfələrlə İƏT-ə üzv olan 40-dan artıq ölkə nümayəndəsinin iştirak etdiyi “Beynəlxalq İƏT Modeli” yarışmalarında Azərbaycanı layiqli şəkildə təmsil ediblər.
18:45 07.10.2025
Oxunuş sayı: 734
