Avropa

Politoloq Rusiya ilə Ukrayna arasında atəşkəsə mane olan məqamları açıqlayıb - MÜSAHİBƏ

ABŞ Prezidenti Donald Tramp Rusiya-Ukrayna müharibəsinin həll oluna biləcəyinə əminliyini ifadə edərək, buna nail olmağın onun gözlədiyindən də çətin olduğunu etiraf edib.

Ağ Evin rəhbəri bu mövqeyi ABŞ Silahlı Qüvvələrinin yüksək rütbəli komandanlığı qarşısında çıxışı zamanı açıqlayıb.

"Düşünürəm ki, biz buna son qoyacağıq. Lakin bu münaqişənin həlli çətin olduğu ortaya çıxıb. ABŞ Ukrayna böhranına pul xərcləmir. Biz NATO-ya avadanlıq satırıq, NATO onun pulunu ödəyir və Ukraynaya və ya başqasına verir. Onlar həmin vəsaiti özündə saxlaya bilərlər", - deyə o vurğulayıb

Məlum olduğu kimi, Tramp ikinci dəfə prezident seçildiyi gündən bəri Şərqi Avropadakı savaşı bitirməyə çalışır. Buna baxmayaraq, rəsmi Vaşinqton hələ ki buna nail ola bilmir.

Ağ Ev rəhbərinin səsləndirdiyi fikirlər barədə politoloq , Beynəlxalq Münasibətlər Təhlili Mərkəzinin eksperti Sultan Zahidov Crossmedia.az-ın suallarını cavablandırıb:

- Müharibənin bitməyini hansı şərtlərlə real hesab edirsiz?

- Müharibənin bitməsi bir neçə şərt reallaşdıqda mümkündür. Aydın məsələdir ki, bu şərtlərdən biri tərəflərdən hansısa birinin qələbə qazanmasıdır. Ya Rusiya Ukraynadakı məqsədlərinə nail olacaq, ya da Ukrayna Rusiya qoşunlarını ərazisindən çıxararaq qələbə qazanacaq. Amma bu iki ehtimal da indiki situasiyada real görünmür. Bu vəziyyət digər ehtimalı- atəşkəsi gündəmə gətirir. Lakin atəşkəsin baş verməsinə də maneə törədən amillər var. Bu amillərdən ən əsası Rusiyanın Donbas istiqamətində ordu toplamasıdır. Rusiya hər gün aramsız şəkildə Ukrayna şəhərlərini bombalayır. Rusiyanın bu addımlarındakı məqsədi qısa zamanda Donbası işğal etməkdir. Ukraynanın atəşkəs zamanı daha ağır şərtlər qəbul etməsi üçün Rusiya daha çox ərazi işğal etməyə çalışır.Ukrayna isə atəşkəsə razıdır. Lakin məsələ ondadır ki, Rusiyanın irəli sürdüyü şərtlərlə atəşkəs artıq kapitulyasiya aktı olacaq. Kiyev də bunun fərqindədir.

- ABŞ-nin Ukraynaya birbaşa deyil, NATO vasitəsilə dəstək göstərməsi hansı strateji səbəblərlə bağlı ola bilər?

- Tramp hələ də Rusiya–Ukrayna məsələsində vasitəçi ola biləcəyinə inanır. Buna görə də vasitəçiliyin tərəfsizlik prinsipinə xələl gətirməmək üçün tərəflərlə müəyyən qədər məsafə saxlamağa çalışır. Digər bir səbəb də budur ki, Ağ Ev rəhbəri öncəki hakimiyyəti Ukraynaya qarşılıqsız hərbi texnikalar verməkdə qınayırdı. İndi isə özü hərbi texnikaları NATO üzərindən Ukraynaya verərək həm qarşılığında ödəniş alır, həm də tərəfsizlik prinsipinə xələl gətirmir.

- Trampın bu açıqlamalarından sonra NATO-nun Ukraynaya yardımları hansı istiqamətdə dəyişə bilər?

- Ukraynaya yardımların istiqaməti, sözsüz ki, Rusiyanın sonrakı addımlarından asılıdır. Rusiya əgər Trampın istədiyi kimi danışıqlara gələrsə, Tramp yardımları dayandıra bilər. Amma əksinə, Rusiya hücumları şiddətləndirərsə, bu zaman Ukraynaya dəstək intensiv şəkildə artacaqdır.

- ABŞ prezidentinin bu çıxışı müharibənin uzanacağının siqnalı ola bilərmi?

- Müharibənin uzanacağı öncədən bəlli idi. İndiki situasiyada tərəflər razılığa gələ bilmirlər. Onlar arasında böyük mövqe fərqləri mövcuddur. Rusiya razılığa gəlmək yox, yeni ərazilər işğal etmək istəyir. Buna görə də müharibənin yaxın zamanda bitməsi real görünmür.

Fatimə Hacıəliyeva

🖨 Çap et

14:55 03.10.2025

Oxunuş sayı: 11599