Müharibənin bitəcəyi tarix açıqlanıb: Yalnız bu yolla Putini danışıqlar masasına gətirmək mümkün olacaq
ABŞ-ın Ukraynaya Rusiyanın enerji infrastrukturuna zərbələr endirməsi üçün kəşfiyyat məlumatları təqdim etməyə hazırlaşması xəbərləri beynəlxalq gündəmi yenidən hərəkətə gətirib. "The Wall Street Journal"-in mənbələrinə istinadən yayılan məlumata görə, Vaşinqton Kiyevə dəstək üçün NATO müttəfiqlərinə müraciət edib, həmçinin Tomahawk qanadlı raketləri və Barracuda döyüş sursatlarını tədarük etməyi nəzərdən keçirir.
Sözügedən iddialar və bunun müharibənin gedişinə mümkün təsiri barədə hərbi ekspert Üzeyir Cəfərov fikirlərini Crossmedia.az-la bölüşüb: "ABŞ-nin Ukraynaya Rusiyanın enerji infrastrukturu hədəflərinə zərbələr endirməsi üçün kəşfiyyat məlumatları və "Tomahawk" qanadlı raketlər ilə "Barracuda" sursatlarının tədarükü ehtimalı artıq reallaşmaq üzrədir. Bu qərar artıq verilib və oktyabr ayı ərzində həm uzaqmənzilli raketlər, həm "Tomahawklar", həm də kəşfiyyat məlumatları Rusiya üçün çox acınacaqlı nəticələr verəcək. Bunu artıq gizlətmirlər”.
O bildirib ki, ABŞ-nin övqeyinin dəyişməsi Rusiyanın artan təsirinə qarşı durmaq və Ukraynaya güc vermək niyyətindən qaynaqlanır: “Ukrayna həmin silah-sursatdan istifadə edərək həm birbaşa təmas xəttində, həm də Rusiyanın dərinliklərindəki strateji əhəmiyyətli obyektlərə zərbələr endirəcək. Yalnız bu yolla Putini danışıqlar masasına gətirmək mümkün olacaq. İqtisadi sanksiyalar özünü tam doğrultmayıb və nəhayət, Rusiyanı güc hesabına danışıqlar masasına oturtmaq qərarı verilib".
Ü.Cəfərov əlavə edib ki, "Tomahawk" qanadlı raketlər minlərlə kilometr məsafəni qət edə bilir və "Barracuda" sursatları da ən müasir tələblərə cavab verir: “Bu silahlar döyüş meydanında vəziyyəti ciddi şəkildə dəyişəcək. Rusiya hələ də kənd və qəsəbələri nəzarətə almaq üçün minlərlə əsgər itirir, amma artıq Ukrayna tərəfindən istifadə olunacaq bu ciddi silahlar onların vəziyyətini daha da ağırlaşdıracaq”.
Onun sözlərinə görə, Rusiya iqtisadiyyatı da ciddi çətinlik içindədir və maliyyə nazirliyi ilə Mərkəzi Bank rəhbərliyi artıq Putinin diqqətinə çatdırıb ki, vəziyyət o qədər də ürəkaçan deyil. “Bu raket və sursatların döyüş meydanına girməsi ilə müharibənin gələn ilin birinci yarısında dayanma ehtimalı yüksəkdir. Müharibə tam dayanmayacaq, amma aktiv döyüş əməliyyatları səngiyəcək və daha çox diplomatların fəaliyyəti nəzərə çarpacaq”.
Mehriban Yariyeva
12:30 03.10.2025
Oxunuş sayı: 19803
