Ukrayna münaqişəsinin həlli mümkün ola bilər: Türkiyə vasitəçilik təklif edir - Açıqlama
Türkiyə Prezidenti Rəcəb Tayyib Ərdoğanın Rusiya-Ukrayna münaqişəsi ilə bağlı son açıqlaması diqqət çəkib. O, Ankaranın təkcə vasitəçilik deyil, həm də daha çox məsuliyyəti üzərinə götürməyə hazır olduğunu bildirib. Söhbət hansı məsuliyyətdən gedir? Burada suallar yaranır.
Türkiyənin Rusiya-Ukrayna müharibəsinin tənzimlənməsi ilə bağlı rolu barədə Crossmedia.az-a açıqlamasında politoloq Natiq Miri bildirib ki, Ukrayna üçün bu gün ən vacib məsələ təhlükəsizlik məsələsidir: "Bu məsələ, təbii ki, yalnız müharibədən sonra mümkün ola bilər. Çünki ortada acınacaqlı bir 1994-cü il Budapeşt Memorandumu təcrübəsi var. Həmin vaxt Rusiya Ukraynaya təhlükəsizlik zəmanəti versə də, 2022-ci ildə Ukraynanı tam işğal etmək üçün hərbi təcavüzə başladı. Bu səbəbdən, atəşkəs mümkün olsa belə, Ukrayna ən çox təhlükəsizlik təminatının əldə olunmasında maraqlıdır".
Politoloqun sözlərinə görə, Ərdoğanın açıqlaması təkcə vasitəçilik deyil, həm də təhlükəsizlik öhdəliyini özündə ehtiva edir: "Bu, Ukrayna üçün ən çətin və vacib məsələlərdən biridir. Çünki bir çox dövlətlər bu yöndə konkret məsuliyyət götürmək istəmirlər. Hətta atəşkəs təmin olunsa belə, ölkələr sülh missiyası çərçivəsində qoşun göndərməkdən çəkinirlər. Lakin Ərdoğanın açıqlamasından belə görünür ki, Türkiyə bu məsuliyyəti üzərinə götürməyə hazırdır. Təbii ki, bu, çox böyük məsuliyyətdir".
Natiq Mirinin fikrincə, bu öhdəliyin prosesə təsiri ilk növbədə Ukraynanın mövqeyindən asılı olacaq: "Əvvəlcə Ukraynanın buna razılıq verməsi vacibdir. Yalnız bundan sonra Türkiyənin prosesə verəcəyi töhfədən danışmaq olar. Hər bir halda bu, çox ciddi və məsuliyyətli addımdır. Çünki müharibənin ağırlığını, sülh prosesini və təhlükəsizlik məsələlərini üzərinə götürmək böyük öhdəlikdir. Türkiyənin bu səviyyədə məsuliyyət daşımağa hazır olması münaqişənin sonlanmasına əhəmiyyətli dərəcədə töhfə verə bilər".
Politoloq əlavə edib ki, hazırda Ukraynanın əsas tələbi məhz təhlükəsizlik zəmanətidir: "ABŞ və NATO üzrə müttəfiqləri olan digər Avropa Birliyi ölkələri bu məsələdə iş aparır. Türkiyənin belə bir açıqlama verməsi isə prosesi çətinləşdirən deyil, əksinə asanlaşdıran məsələdir".
Fatimə Məmmədova
16:26 01.10.2025
Oxunuş sayı: 1568
