Azərbaycan-Özbəkistan münasibətləri türk dünyası üçün nümunə olacaq - Professor
Bakıda başlayan II Azərbaycan-Özbəkistan Media Forumu qardaş xalqlar arasında dostluq və əməkdaşlığın gələcək inkişafına yönəlib. Özbəkistan və Azərbaycan arasında müttəfiqlik münasibətlərinin media sahəsində də möhkəmləndiyi vurğulanıb. Rəqəmsal media mühitinin nizama salınması, yeni texnologiyaların tətbiqi və jurnalistikanın peşəkar standartlarının qorunması istiqamətində qarşılıqlı təcrübə və bilik mübadiləsi hər iki ölkənin media sektorunun inkişafına mühüm töhfə veriləcəyi vurğulanıb.
Crossmedia.az-a mövzuyla bağlı münasibət bildirən professor Sabir Məmmədli bildirib ki, ümumiyyətlə Azərbaycan son illər çox düzgün addım atır və türk dünyası ilə əməkdaşlığa xüsusi diqqət yetirir. Professor qeyd edib ki, həm xarici siyasət məsələlərində, həm təhsil sahəsində həm də sosial-iqtisadi sahələrdə əməkdaşlıqlar mövcuddur: “Bu mənada türk dünyası ilə birləşmək, türk dünyası ilə əməkdaşlıq etmək çox vacib və əhəmiyyətlidir. Özbəkistan türk dövlətləri arasında əhali sayına görə Türkiyədən sonra 2-ci yerdə durur. Bu çox böyük göstəricidir. Özbəkistan cəmiyyəti öz intelektual potensialına görə, kifayət qədər güclü bir dövlətdir. Bu baxımdan da elm sahəsində xüsusi əməkdaşlıq, gələcəyə yönəlik bir addımdır. Media sahəsində də əməkdaşlıq son dərəcə əhəmiyyətlidir’’.
Sabir Məmmədli qeyd edib ki, media gələcəyi qurur, insanların düşüncəsinə təsir edir. Onun sözlərinə görə, əməkdaşlığımız türk dünyasının möhkəmlənməsinə, o cümlədən Azərbaycan-Özbəkistan əlaqələrinin güclənməsinə çox böyük təsir göstərəcək: “Artıq bir neçə ildir ki, Azərbaycan-Özbəkistan media əlaqələri qurulur hətta, özbək alimləri, jurnalistlər Azərbaycana gəlmişdilər. Bizim mütəxəssislərimiz, alimlərimiz Özbəkistana getmişdilər. Elmi tədqiqat və arxiv sahəsində əlaqələrin qurulması məsələsində çox mühüm addımlar atılmışdı. Bu mənada Azərbaycan-Özbəkistan media formu növbəti bir mərhələdədir. Düşünürəm ki, bu media vasitələrinin güclənməsi, əməkdaşlığın artırılması baxımından çox vacibdir. Çünki, informasiya axını hər iki ölkə üçün, eyni zamanda bütün türk toplumu üçün əhəmiyyət kəsb edəcək’’.
Müsahibin sözlərinə görə, Azərbaycanın və Özbəkistanın daxili həyatında baş verən məsələlər mediada işıqlandırılır. Professor Məmmədli bildirib ki, Özbəkistan cəmiyyəti Azərbaycana kifayət qədər güclü rəğbət bəsləyir, Azərbaycana “Şərqdən doğan günəş” kimi baxır: “İqtisadi məsələlər də kifayət qədər çoxdur. Özbəkistan Qarabağa yatırım edir, çox böyük işlər görür. Sözsüz ki, Azərbaycanın daxili həyatı da, Özbəkistan mediasında işıqlandırılır. 20-ci əsrin əvvəllərində də bu əlaqələr güclü olub, artıq yeni əlaqələr də yaradılır. Yaxın zamanda, Özbəkistan alimləri Bakı Dövlət Universitetində olublar və ikili diplom məsələsi gündəmə gəlib. BDU-nun rektoru Elçin Babayevlə saziş imzalayıb, gələcəkdə ikili diplom məsələsini müzakirə ediblər. Özbəkistanla kifayət qədər maraqlı əlaqələr yaranıb, düşünürəm ki, Azərbaycan-Özbəkistan münasibətləri türk dünyası üçün nümunə olacaq. İki cəmiyyətin bir-biri ilə olan isti münasibəti hamımızı sevindirir’’.
Sevinc
17:42 30.09.2025
Oxunuş sayı: 9548
