Üçüncü dünya müharibəsi istiqamətində atılan ilk addım: Böyük savaş qapıdadır
Belarus Prezidenti Aleksandr
Lukaşenko Ukrayna böhranı ilə bağlı yeni açıqlama verərək, Ukrayna lideri
Volodimir Zelenski ilə danışıqlar aparmaq istədiyini bəyan edib. O, “Rossiya 1”
telekanalına müsahibəsində qeyd edib ki, regionda vəziyyət getdikcə gərginləşir
və tərəflərin məsləhətləşmələrə başlamasının vaxtı çatıb. Lukaşenkonun fikrincə,
Rusiya ordusunun cəbhələrdə irəliləməsi Ukraynanın gələcəyini ciddi təhlükə
altına salır və Zelenski dayanmadan davam edərsə, ölkəsini tamamilə itirmək
riski ilə üz-üzə qalacaq. Belarus lideri həmçinin bildirib ki, münaqişənin həlli
ilə bağlı konkret təkliflər mövcuddur və bu məsələdə ABŞ-nin Prezidenti Donald
Tramp da məlumatlıdır.
Mövzu ilə bağlı Crossmedia.az-a açıqlama verən politoloq Natiq Miri bildirib ki, Lukaşenkanın “əgər Zelenski razı olmasa, bütün Ukraynanı itirə bilər” fikri Zelenski tərəfindən ciddi qəbul olunmayacaq. Onun sözlərinə görə, Rusiya son 3 il yarım ərzində əlində olan ən güclü imkanlardan istifadə edib və 2025-ci ilin yaz və yay əməliyyatları nəticəsində, demək olar ki, əks-hücumlar vasitəsilə bəzi əraziləri yenidən itirməkdədir: “Bu ərazilər, yəni 300 kvadrat kilometrdən çox ərazinin bu il ərzində demək olar ki, tam olaraq geri qaytarıldığı, Rusiyanın müxtəlif hərbi hissələrinin Donbasın, Donetsk vilayətinin Pakrovsk şəhəri ətrafında mühasirəyə alındığı bildirilir. Üç fərqli hərbi hissə ölümlə üz-üzədir və hər gün bu mühasirə daraldılır, mühasirəyə düşən hərbi hissə məhv edilir. Ona görə də Ukrayna və ona dəstək verən Qərb dünyası Lukaşenkonun bu fikrini ciddi qəbul etmir”.
N.Miri əlavə edib ki, Zelenski yalnız müəyyən şərtlər daxilində, yəni bütün ərazilərin geri qaytarılması şərti ilə danışıqlara razı ola bilər: “Rusiya istədiyi kimi irəliləyə bilmir, irəli atılan hərbi hissələr dərhal artilleriya, raket və dronlarla məhv edilir. Cəbhədə istənilən xəttdə 20–30 kilometr məsafə var, açıq ərazilərdə hər hərəkət dərhal məhv olunur. Bu səbəbdən cəbhədə irəliləmək artıq mümkün deyil və Rusiya ciddi üstünlük əldə edə bilmir. Rusiyanın ağır vəziyyətdə olduğu gerçəyi Lukaşenkonun da diqqətindədir. ABŞ Prezidenti Donald Trampın nümayəndəsinin ötürdüyü mesajlar və Amerikan mediasının yaxın zamanda Ukrayna ordusunun əks-hücuma keçəcəyi barədə məlumatları bu durumu təsdiqləyir. Ukrayna ordusuna Qərb tərəfindən ciddi strateji silah yardımları gəlir. Eyni zamanda Rusiya Krımda, Qara dəniz sahillərində və ərazisi boyu neft emalı zavodlarının vurulması nəticəsində ciddi itkilər verir.
“Bütün bunlar göstərir ki, Lukaşenkonun sülhpərvər kimi görünməsi yalnız ukraynalılara rəhmi gəldiyi üçün deyil. Rusiyanın vəziyyətinin bu ilin sonuna qədər ağır olacağı səbəbi ilə Belarus lideri də prosesdə rol almağa çalışır. O, istəyir ki, müharibə tez bitsin və Belarus bir daha müharibəyə müdaxilə etməsin. Müharibəyə müdaxilə ölkə şəhərlərində dağıntılara və itkilərə səbəb olar. Bu, Lukaşenko hakimiyyəti üçün də arzuolunmazdır”, – Natiq Miri bildirib.
Politoloq əlavə edib ki, əgər Rusiya, Belarus və Ukrayna işğal olunmuş ərazilərin geri qaytarılması şərti ilə oturub danışa bilsələr, bu müharibənin bitməsinə və dünyanın rahatlamasına səbəb olar: “Üçüncü dünya müharibəsinin hibrid yönü artıq başlayıb: Polşadan Rumıniyaya göndərilən dronlar, qırıcı təyyarələrin Estoniya üzərində, NATO ölkələri üzərində uçuşları göstərir ki, Rusiya hibrid müharibə vasitələrindən istifadə edir. Bu, yeni böyük yanğın riskini artırır. Müharibənin bitməsi hər kəsin marağındadır, amma yalnız beynəlxalq hüquq çərçivəsində – işğal olunmuş ərazilərin geri qaytarılması, atəşkəsin təmin olunması və yekun sülh müqaviləsinin imzalanması ilə mümkündür. Rusiyanın hazırkı vəziyyətdə buna getməyəcəyi baş verən hadisələrdən aydın görünür".
Mehriban Yariyeva
19:46 27.09.2025
Oxunuş sayı: 8129
