Putin geri çəkilmir, əksinə NATO ölkələrinə təhdidlərini artırır-Açıqlama
ABŞ dövlət katibi Marko Rubio Rusiyanı Ukraynada davam edən müharibəyə son qoymağa çağırıb. Onun sözlərinə görə, Tramp administrasiyasından sonra Vaşinqton bu müharibənin başa çatmasında maraqlıdır. Lakin bütün səylərə baxmayaraq, münaqişənin yaxın vaxtlarda bitəcəyi hələ də real görünmür.
Mövzu ilə bağlı Crossmedia.az-a açıqlama verən hərbi ekspert Telman Qasımov bildirib: "Müharibənin bitməsi hər kəsin marağındadır. Amma reallıq budur ki, hər hansı müharibə yalnız tərəflərdən birinin güzəştə getməsi ilə dayana bilər. Güzəştsiz sülhdən danışmaq mümkün deyil".
Telman Qasımov qeyd edib ki, hazırda Rusiya tələb edir ki, Ukrayna Moskvanın işğal altında saxladığı ərazilərdən birdəfəlik imtina etsin və əlavə olaraq neytral zona yaradılsın: "Lakin Ukraynanın bu şərtləri qəbul etməsi gözlənilmir. Çünki əgər Putin geri çəkilsə, Rusiyada, xüsusilə də Kremlin daxilində ciddi siyasi böhran yarana bilər. Ukrayna Prezidenti Volodimir Zelenskinin bir neçə gün əvvəl Donald Trampla görüşündən sonra müharibənin sonu ilə bağlı yeni ritorika meydana çıxıb. Görüşün detalları açıqlanmasa da, bəzi dəyişikliklərin baş verdiyi görünür".
Hərbi ekspert bildirib ki, Ukrayna ordusu hazırda irəliləməkdədir: "Krımda Putinin şəxsi iqamətgahının yerləşdiyi küçə dron hücumuna məruz qalıb, Rusiya isə beş vilayətdə bombardmanlarla üzləşib. Moskvanın mərkəzi də hücumlara məruz qalıb, yanacaq bazaları və hərbi obyektlər sıradan çıxarılıb. Bu şəraitdə Zelenskinin güzəştə getməsi real görünmür. Qərbin dəstəyi Ukraynanın ayaqda qalmasını və effektli hücumlar həyata keçirməsini təmin edir. Hazırda əsas söz sahibi ABŞ-dır. Tramp isə müharibənin sürətlə bitməsini istəyir, amma onun üçün kimin qalib gəlməsi deyil, prosesin dayandırılması və Ukraynanın yeraltı-yerüstü sərvətlərinə nəzarət məsələsi daha önəmlidir".
Telman Qasımov vurğulayıb ki, Putin geri çəkilmək niyyətində deyil və əksinə, NATO ölkələrinə təhdidlərini artırır: "Bu da onu göstərir ki, vəziyyət qeyri-sabit olaraq qalır".
Hərbi ekspertin qənaətinə görə, əgər Qərbin dəstəyi davam edərsə və Ukrayna hava hücumundan müdafiə sistemlərini gücləndirə bilsə, 2026-cı ildə Ukraynanın uğurları daha da artacaq.
Xumar Emilqızı
18:33 25.09.2025
Oxunuş sayı: 3850
