Müharibədə konkret üstün tərəf olmayana qədər vasitəçilik ciddi nəticə verməz – Rəy
Türkiyə Prezidenti Rəcəb Tayyib Ərdoğan BMT Baş Assambleyasının 80-ci sessiyasında çıxışı zamanı bildirib ki, Ankara Rusiya-Ukrayna münaqişəsinin həlli üçün atəşkəsə nail olmaq istiqamətində səylərini davam etdirəcək. O, İstanbul prosesinin bu istiqamətdə mühüm rol oynadığını vurğulayıb və Türkiyənin əsir mübadiləsi, humanitar məsələlərdə vasitəçi kimi fəaliyyətini xatırladıb.
Türkiyənin bu istiqamətdə vasitəçilik cəhdləri göstərir ki, Ankara bölgədə sabitlik və diplomatik nüfuzunu qorumaqda maraqlıdır. Ərdoğanın “müharibədə qalib olmur” ifadəsi isə beynəlxalq ictimaiyyətə münaqişənin hərbi yox, siyasi yolla həllinə çağırış kimi dəyərləndirilə bilər. Bu yanaşma həm regionun təhlükəsizliyi, həm də qlobal sabitlik baxımından əhəmiyyətlidir.
Mövzu ilə bağlı Ağ partiyanın sədr müavini Əhəd Məmmədli Crossmedia.az-a açıqlama verib.
Ə.Məmmədli müharibədə konkret üstün tərəf olmayana qədər heç bir ölkənin vasitəçiliyinin ciddi nəticə verməyəcəyini bildirib: “Hər bir müharibənin real nəticəsi odur ki, biri qalib gəlir, digəri isə məğlub olur. Ondan sonra artıq vasitəçilər ortaya çıxır və məsələnin həllində rol oynayırlar. Rusiya-Ukrayna müharibəsində isə vəziyyət bir qədər fərqlidir: bir tərəf müəyyən üstünlüyə malikdir, amma qarşı tərəfi tam məğlub edəcək səviyyədə deyil. Ukrayna da ciddi müqavimət göstərir. Türkiyə vasitəçilik etməyə çalışır, amma uzaq başı əsir mübadiləsi mümkündür. Çünki Rusiyanın istəkləri ilə Ukraynanın mövqeyi kəskin ziddiyyət təşkil edir.
Bu səbəbdən, müharibədə konkret üstün tərəf formalaşmayana qədər Türkiyənin, Amerikanın və ya başqa ölkələrin vasitəçiliyi ciddi nəticə verməyəcək. Ən yaxşı halda, Putinlə Zelenski bir görüşə gətirilə bilər, ümumi sözlər ifadə olunar. Amma hər iki tərəf öz mövqeyindən geri çəkilmədiyi üçün bu mərhələdə vasitəçilikdən real irəliləyiş gözləmək çətindir. Hətta hansı ölkənin vasitəçi olması da əhəmiyyət daşımır – Türkiyə, ABŞ, Xorvatiya və ya başqa bir dövlət fərq etməz”.
Nicat Rüstəmzadə
18:34 24.09.2025
Oxunuş sayı: 6935
