Kollektiv Qərb Rusiya qarşısında qətiyyətli mövqe nümayiş etdirərsə işğalçılıq siyasətinin qarşısını almaq olar - Açıqlama
Rusiya-Ukrayna müharibəsinin başlanmasından artıq illər ötür. İlk günlərdə qısa müddətdə həll ediləcəyi düşünülən bu qarşıdurma zaman keçdikcə yalnız regionun deyil, bütün dünyanın siyasi gündəminin mərkəzinə çevrildi. Bu müharibə artıq sadəcə iki ölkə arasındakı ərazi mübahisəsi deyil, qlobal güclərin maraq toqquşması müstəvisində formalaşan mürəkkəb geosiyasi prosesdir. Tərəflər arasında sülh sazişinə nail olmaq istiqamətində bir sıra təşəbbüslər göstərilsə də, nəticə əldə olunmayıb. Əksinə, diplomatik masada baş verən uğursuzluqlar cəbhədə daha şiddətli döyüşlərə yol açır. Münaqişənin həllini istəyən beynəlxalq qüvvələr də açıq şəkildə etiraf edirlər ki, bu savaşın sonu hələ uzaqdadır. Avropa dövlətlərinin Rusiyaya qarşı sərgilədiyi sərt və birmənalı düşmən mövqeyi isə müharibəni daha da qızışdırır. Ukraynaya davamlı silah yardımı və hərbi dəstək Moskvanın reaksiyasını sərtləşdirir, nəticədə müharibənin coğrafiyası və təsir dairəsi genişlənir. Rusiya Qərbin bu addımlarını öz milli təhlükəsizliyinə təhdid kimi qəbul edərək hərbi-siyasi gedişlərini daha da kəskinləşdirir. Artıq bu müharibə sadəcə Rusiya ilə Ukraynanın gələcəyini deyil, beynəlxalq münasibətlərin sabitliyini, enerji təhlükəsizliyini, qlobal iqtisadiyyatı və böyük güclər arasındakı yeni güc balansını müəyyənləşdirən həlledici faktor kimi çıxış edir.
Mövzu ilə bağlı politoloq Aytən Qurbanova Crossmedia.az-a açıqlama verib:
“Trampın Rusiya-Ukrayna müharibəsi ilə bağlı verdiyi son bəyanatlar onu deməyə əsas verir ki, Alyaska görüşü çərçivəsində və sonrasında Putinin nümayiş etdirdiyi mövqe Trampın bu məsələ ilə bağlı yanaşmalarında ciddi dəyjşikliklərə səbəb olub. Çünki hakimiyyətə gəldiyi ilk gündən etibarən Rusiya ilə canışıqlar yolu ilə müharibəyə son qoymağı hədəfləyən ABŞ artıq Ukraynaya dəstəyin artırılması mövqeyindən çıxış etməyə başlayıb. Çünki Amerikanın əsas hədəfi Rusiyanın özünü tam qalib elən edə bilməyəcəyi reallıqlar şəraitində müharibəyə son qoymaq idi. İndiki məqamda bu heç bir halda real görünmür. Deməli Ukrayna üçün bədbin ssenari olan ərazi güzəşti ehtimalı yenidən müzakirə mövzusuna çevrilə bilər. Amma Trampın son açıqlamarında tamamilə fərqli mövqedən çıxış edərək, Avropa İttifaqının dəstəyilə Ukraynanın müharibədən əvvəlki sərhədlərə qayıtmağa qadir olduğunu bildirib. Deməli müharibənin qısa müddət ərzində bitməsi ehtimalı demək olar ki, yoxdur. İndiki məqamda əsas məsələ hərbi əməliyyatların Ukrayna sərhədlərini aşmadan davam etməsi və Rusiyanı geri çəkilməyə məcbur edəcək addımların intensivliyinin təmin olunmasıdır. Düşünürəm ki, əgər kollektiv Qərb Rusiya qarşısında qətiyyətli mövqe nümayiş etdirərək həmrəyliyə nail olsa, daha əlverişli şərtlərlə danışıqları bərpa etmək və Rusiyanın işğalçılıq siyasətinin qarşısını almaq mümkün ola bilər”.
Ayhan
17:12 24.09.2025
Oxunuş sayı: 5692
