Ərdoğanın rəqibi dəyişmədi: Türkiyə daxili siyasətində nələr olacaq?
Türkiyənin müxalif Cümhuriyyət Xalq Partiyasının (CXP) növbədənkənar qurultayı keçirilib. Səsvermənin nəticələrinə əsasən, hazırkı sədr Özgür Özel 917 seçicidən 835-nin (82 səs keçərsiz sayılıb) səsini qazanaraq yenidən partiyanın lideri seçilib. O, seçkiyə yeganə namizəd kimi qatılmışdı.
2023-cü ildən Türkiyə müxalifətinə liderlik edən Ö.Özalın yenidən CXP sədri seçilməsi ölkənin daxili siyasətinə təsir edəcək?
Bu barədə Crossmedia.az-a açıqlama verən beynəlxalq münasibətlər üzrə ekspert Əziz Əlibəyli hakimiyyətin əsas alternativinə çevrilmək üçün Özalın mühüm bir imtahandan uğurla keçdiyini qeyd edib: "Qırılma nöqtəsi yaranmışdı və müxalifət partiyası ciddi bir sınaq qarşısında idi. Çünki keçmiş CHP sədri Kamal Kılıçdaroğlu artıq geri çəkilməli idi və böyük təşkilati imtahanların qarşısını almaq mümkün deyildi. Ən çətin məqamda seçkiyə gedilməsi və etimadın yenilənməsi isə Özgür Özəlin mövqelərini xeyli gücləndirdi. Proseslərin gedişi göstərir ki, o, hakimiyyətin əsas alternativinə çevrilmək üçün mühüm bir imtahandan da uğurla keçdi".
Müsahibimiz, həmçinin Özalın yenidən seçilməsi ilə artıq İstanbul Böyük Şəhər Bələdiyyəsinin sədri Əkrəm İmamoğluya alternativ olduğunu da qeyd edib: "Beləliklə, bu mərhələdən sonra İmamoğlunun alternativi kimi məhz Özgür Özəlin adı ön plana çıxır. Onun hər hansı bir məhkəmə hökmü ilə siyasi səhnədən kənarlaşdırılmadığı təqdirdə, görünən odur ki, CHP elitası tərəfindən dəstəklənən əsas fiqur məhz o olacaq. Bu isə o deməkdir ki, qarşıdakı dövrdə müxalifətin lideri və eyni zamanda yeni prezidentliyə namizəd kimi Özgür Özəli görməyimiz ehtimalı daha da artır".
Elmir Heydərli
11:29 23.09.2025
Oxunuş sayı: 5493
