Narkomaniyanın qarşısını almaq üçün əməliyyat tədbirləri görüləcək - Hüquqşünas
Prezident İlham Əliyev narkotik vasitələrin və psixotrop maddələrin qanunsuz dövriyyəsinə, həmçinin narkomanlığa qarşı mübarizəni gücləndirmək məqsədilə 2025–2030-cu illəri əhatə edən Dövlət Proqramını təsdiqləyib. Sənəd çərçivəsində tədbirlərin əlaqələndirilməsi, icrasına nəzarət və monitorinq xüsusi qurumlara həvalə olunub. Dövlət Komissiyası isə hər il görülən işlər barədə Prezidentə hesabat təqdim edəcək.
Mövzu ilə bağlı hüquqşünas Ramil Süleymanov Crossmedia.az-a açıqlama verib.
R.Süleymanov proqramın əsas məqsədinin ölkədə narkomaniya səviyyəsini aşağı salmaq və narkotacirliklə mübarizə aparmaq olduğunu bildirib: “Ümumiyyətlə, ölkə başçısının sərəncamı ilə təsdiqlənmiş bu proqramın əsas məqsədi ölkədə narkomaniyanın səviyyəsini aşağı salmaq, narkotacir və narkobizneslə mübarizə aparmaq, eyni zamanda narkomaniya xəstəliyinin artmasının qarşısını almaq üçün əməliyyat tədbirlərinin həyata keçirilməsidir. Bundan başqa, proqram narkotik vasitələrin istər sintetik, istərsə də təbii yolla hazırlanmasının qarşısını almağa yönəlib. Hesab edirəm ki, bununla bağlı ciddi maarifləndirmə və təbliğat işləri də aparılmalıdır ki, narkomaniya xəstəliyinin, ümumiyyətlə, narkomanlığın bəşəriyyət üçün nə qədər zərərli və təhlükəli olduğu daim diqqət mərkəzində olsun. Qeyd edim ki, zaman-zaman bu istiqamətdə dövlət proqramları həyata keçirilib. Ümumiyyətlə, narkomaniyanın bir xəstəlik kimi tanınması və bununla bağlı tibb sahəsinin inkişafını nəzərdə tutan tədbirlərin də dövlət proqramına daxil edilməsi daha məqsədəuyğun olardı”.
Nicat Rüstəmzadə
14:07 19.09.2025
Oxunuş sayı: 5920
