Ukrayna ilə bağlı inanılmaz proqnoz: "Yaxın 2-3 ay ərzində..."
Ukrayna Prezidenti Volodimir Zelenski ölkəsi ilə bağlı gündəmdə olan planları açıqlayıb.
Zelenski bu gün Avropa Parlamentinin prezidenti Roberta Metsola ilə birgə mətbuat konfransında bildirib.
"Bizim iki planımız var. Biri müharibəni bitirmək, digəri isə müharibənin xərclərini qarşılamaq üçün əlavə maliyyələşdirmə tapmaq. Bu müharibənin xərci, məsələn, bu gün üçün bir ilin qiyməti 120 milyard dollardır. 60-nı Ukrayna büdcəsi verir, digər 60-nı mən tapmalıyam. Ümid edirəm ki, biz bu müharibəni bitirəcəyik, amma hər halda, A planı - bitirmək, B planı - 120 milyardı təmin etməkdir", - Zelenski vurğulayıb.
Maraqlıdır Ukrayna bu planlardan hansısa birini yerinə yetirə biləcəkmi?
Məsələ ilə bağlı Crossmedia.az-a açıqlama verən politoloq Natiq Miri qeyd olunan A və B planlarını paralel şəkildə həyata keçirilməli olduğunu, yalnız birinə xüsusi üstünlük verilməsinin Ukrayna dövləti üçün aldadıcı olacağını qeyd edib:
"Zelenskinin səsləndirdiyi A və B planları paralel şəkildə həyata keçirilməlidir. Çünki yalnız birinə xüsusi üstünlük verilməsi Ukrayna dövləti üçün aldadıcı ola və çox mənfi nəticələrə gətirib çıxara bilər. Ona görə də bütün situasiyalara hazır olmaq üçün hər iki variant eyni vaxtda icra olunmalıdır.
Bu, məsələnin birinci tərəfidir. Zelenskinin hər iki planı səsləndirməsi də məhz potensial riskləri nəzərə almasından irəli gəlir. Yəni, yalnız bir variantın önə çıxarılması yanlış olardı.
Maliyyə məsələsinə gəldikdə isə burada, təbii ki, Ukrayna hakimiyyətinin üzərinə böyük məsuliyyət düşür. Çünki bu gün istəməsən, kimsə sənə könüllü şəkildə yardım etməyəcək. Təkcə istəmək kifayət deyil; nə üçün bu yardıma ehtiyac olduğunu izah etmək və qarşı tərəfi bu dəstəyin zəruriliyinə inandırmaq lazımdır. Bu isə ciddi, məsuliyyətli fəaliyyət tələb edir. Əslində, Zelenski hakimiyyəti 2022-ci ildən bəri bununla məşğuldur.
Maliyyənin tapılmasına gəldikdə isə bu, mümkündür. Çünki Ukraynanın məğlubiyyəti hazırkı şəraitdə Avropa İttifaqını və bütövlükdə Qərbi ciddi şəkildə təhdid edir. Məsələn, Polşa və Rumıniyaya Rusiya tərəfindən göndərilən dronlar təhlükənin real olduğunu açıq göstərir. Bu həm də o deməkdir ki, əgər Ukrayna kapitulyasiyaya məcbur edilərsə, Rusiya imperializminin iştahı daha da artacaq. Çünki Moskva artıq təkcə postsovet məkanı ilə kifayətlənmir, Şərqi Avropa, Baltikyanı ölkələr, hətta Balkanlarda da nüfuz dairəsi yaratmaq niyyətindədir".
Onun sözlərinə görə, Rusiya tarixi olaraq həmişə imperiya iddiasında olub. Hakimiyyətlər dəyişsə də, bu siyasətin mahiyyəti dəyişmir. Lakin belə iddialar yalnız imkanlarla uzlaşdığı halda reallığa çevrilə bilər. Bu gün isə Rusiya Ukrayna müharibəsində açıq şəkildə bataqlığa düşüb və sürətlə tükənir. Yay əməliyyatları fonunda yüz minlərlə itki verən Moskva nəticə etibarilə Ukrayna ərazilərinin bir faizindən də azını işğal edə bilib. Halbuki Ukrayna ordusu bu torpaqları kənd-kənd geri qaytarır. İstər canlı qüvvə, istər texnika, istərsə də maliyyə baxımından verilən bu böyük itkilərin fonunda Rusiyanın hərbi uğurundan danışmaq mümkün deyil.
Əgər Rusiya bu qədər itki ilə hətta Donbasın inzibati sərhədlərinə belə çata bilmirsə, bu müharibənin mənası nədir? Zelenski də bu gerçəyi çox yaxşı bilir. Ona görə də bir tərəfdən ordunu gücləndirmək, müasir silahlar, pilotsuz uçuş aparatları, ballistik raketlər istehsal etmək istiqamətində ciddi addımlar atır ki, Rusiyanın itkiləri daha da artsın. Çünki bu itkilər artdıqca Rusiya sürətlə zəifləyir. Digər tərəfdən isə sanksiyalar məsələsi gündəmdədir.
Əslində, ən böyük sanksiyanı Ukraynanın özü tətbiq edir. Çünki bu, kağız üzərində yox, real döyüş meydanında baş verir. Rusiyanın neft emalı zavodları bir-bir sıradan çıxarılır və yaxın aylarda ölkədə benzin növbələrinin yaranacağı artıq aydın görünür. Bu proses Rusiyanın enerji ixracını da zəiflədəcək, nəticədə hərbi əməliyyatları davam etdirmək imkanlarını xeyli məhdudlaşdıracaq. Bütün bunları nəzərə aldıqda, Zelenskinin dedikləri həm gerçək, həm də məntiqlidir. Yaxın 2-3 ay ərzində bu strategiyanın nəticələrini bütün dünya açıq şəkildə görəcək".
Elmir Heydərli
23:30 18.09.2025
Oxunuş sayı: 836
